प्रकाशचन्द्रले भने : धार्मिक सम्मानसहितको हिन्दुराष्ट्र हाम्रो एजेन्डा

काठमाडौँ : एकीकृत राष्ट्रवादी प्रजातन्त्र पार्टीका अध्यक्ष डा. प्रकाशचन्द्र लोहनीले हिन्दु राष्ट्र आफूहरुको एजेन्डा भएको बताएका छन् । पशुपति शमशेर जबरा नेतृत्वको राष्ट्रिय प्रजातन्त्र पार्टी (प्रजातान्त्रिक) सँग शुक्रबार भएको एकता घोषणासभामा बोल्दै नेता लोहनीले आफूहरुको साझा एजेन्डा धार्मिक स्वतन्त्रतासहितको हिन्दु राष्ट्र भएको बताएका हुन् । 

'हामी राष्ट्रलाई बुद्ध र हिन्दु धर्मको सम्मानसहित धार्मिक स्वतन्त्रसहितको हिन्दु राष्ट्रका लागि अघि बढ्छौँ', पूर्वपञ्चहरूका दुई पार्टीबीचको एकता घोषणा समारोहमा बोल्दै डा. लोहनीले यस्तो बताएका हुन्, 'हिन्दु धर्म हाम्रो संस्कृति हो । यसलाई बोकेर आधुनिक युगमा जान सकिन्छ भन्ने हाम्रो धारणा हो । यो पहिचानलाई संरक्षण गर्नुपर्छ ।'

नेता लोहनीले हिन्दुको विषय पुरातनवादी भन्नेहरुलाई जवाफ दिँदै आफ्नो संस्कृति जोगाउनु कहिल्यै पुरातनवादी नहुने जिकिर गरे ।

'नेपालको पहिचान हिन्दु राष्ट्रको रूपमा हुनुपर्छ भन्ने हाम्रो माग हो । २१औँ शताब्दी जनताले शासन गर्ने हो । हामी यसलाई अंगिकार गर्छौ', उनले भने, 'नेपालमा संवैधानिक राजसंस्थासहितको प्रजातन्त्र आवश्यक छ। राजसंस्थालाई अभिभावकको रूपमा प्रयोग गरेको देशमा स्थिरता छ ।'

अहिले नेपालमा अभिभावकत्व दिने संस्था पार्टी भएका उनले बताए । 'ओली प्रधानमन्त्री हुँदा संसदीय मान्यतालाई  लत्याउँदै सिधै प्रधानमन्त्री बनाइयो, किन यसो गरियो ? राष्ट्रपति पार्टीको सदस्य हो', उनले भने । 

लोहनीले भ्रष्टाचारविरुद्ध लडाईँमा अघि बढ्ने पनि बताए । 'भ्रष्टाचारले सीमा नाघेको छ। भ्रष्टाचारको संस्कार नेपालको दुष्मन हो', लोहनीले भने, 'स्थिर सरकारले नेपालमा स्थिर कुशासन र लुटतन्त्र लागू गर्न लागेको छ। एनसेलको कर कहाँ गयो ? ३३ किलो सुन कहाँ गयो ? प्रधानमन्त्री कार्यालयमा फाइल छ रे ! देखाउनुस् ।'

वाइडबडी काण्डमा ठूला दल चुप रहेकोमा लोहनीले कटाक्ष गरे । 'नेपालमा मार्सी चामल पुँजीवाद आएको छ। डा. केसी यसविरुद्ध छन्, उनी जीवनमरणको दोसाँधमा छन् तर सरकार मौन छ', उनले भने, 'नेपालका उद्योगहरू कहाँ गए ? जवाफ दिन सक्नुहुन्छ ? यो सबै हाटहुट लाटलुट कम्पनी प्राइभेट लिमिटेडलाई चाहिँदैन ।'

अहिले प्रतिपक्ष कमजोर रहेको लोहनीको निचोड छ। 'वाइडबडी आउन साथ प्रतिपक्ष पनि चुप भयो। मार्सी चामलको पुँजीवाद त्यहाँ त पुगेन ?', लोहनीले भने, 'देशमा ठाडो अधिनायकवाद छ। देशमा संसद सर्वोच्च छ भन्दै धम्की दिइँदैछ। तर देशमा संविधान सर्वोच्च हो। हामी यी सबै विषयमा संघर्ष गर्नेछौँ।'

लोहनीले धर्म र संस्कृतिमाथिको हमला तोड्नुपर्ने चुनौती आएको पनि बताए । 'संस्कृतिमाथि हमला गर्दै जिसस पुत्रीको नाममा होलीवाइन खान सरकार लागेको छ', उनले भने, 'प्रतिपक्ष नराखेर शासन गर्ने लक्षमा छ कम्युनिस्ट सरकार। हामी यो देशको प्रजातन्त्र कसैको खेलौना बनाउन दिँदैनौँ। हामीले पदका लागि होइन देश बनाउन एकता गरेका छौँ।'