काठमाडौं : प्रधानमन्त्री केपी शर्मा ओलीले सरकारले सही बाटो र सही नीति लिएको बताएका छन् । नेपाल कम्यूनिष्ट पार्टी (नेकपा) का सांसदहरुसँग शुक्रबार बालुवाटारमा भएको छलफलमा प्रधानमन्त्री ओलीले यस्तो कुरा बताएका हुन् ।
प्रधानमन्त्री ओलीले कुनै पनि बिषयबारे राम्रो अध्ययन गरेर मात्रै संसदमा प्रस्तुत हुन आग्रह गरेका छन् । पार्टीको नीति र विधिभित्र रहेर आफ्ना कुरा राख्न प्रधानमन्त्री ओलीले सांसदहरुलाई सम्झाएका हुन् ।
प्रधामन्त्रीले पार्टीको एकता प्रक्रिया चाँडै टुंगिने पनि दाबी गरे । ‘पार्टीको एकता प्रक्रिया टुंगोमा नपुग्दा केही अन्यौल भएको छ, तर अब चाँडै यो प्रक्रियाले अन्तिम रुप लिन्छ’, ओलीले भने, ‘त्यसपछि पार्टीका नीति निर्देशन स्थानीय तहमा पुग्छन् । यसो भएमा स्थानीय तहलाई निर्देशित गर्न पनि सजिलो हुन्छ ।’
प्रधानमन्त्री ओलीले समय मिलाएर संसदीय दलको बैठक नियमित राखिने आश्वासन दिँदै सांसदहरुलाई प्रशिक्षित पनि गरिने बताए । प्रधानमन्त्री ओलीले मन्त्रीहरुलाई सांसदहरुसँग घनिष्ठ सम्बन्ध राख्न पनि आग्रह गरेका छन् ।
‘कतिपय अवस्थामा मन्त्रीहरु सिधै जनतासँग जोडिन सकेका हुदैनन्’, उनले भने, ,त्यसका लागि सांसदहरुमार्फत मन्त्रीहरुले जनताका कुरा सुन्ने र आफ्ना कुरा पठाउने गर्नुपर्छ ।’
प्रतिक्रिया दिनुहोस !
