भक्तपुर : भारतको उत्तराखण्डस्थित केदारनाथको शीर घोषणा गरिएको डोलेश्वर महादेव मन्दिरमा समितिको नेतृत्वमा करिब ५७ करोड रुपैयाँको गुरुयोजना तयार गरी विभिन्न भौतिक संरचना निर्माण अघि बढेको छ ।
भक्तपुरको सूर्यविनायक नगरपालिका ८ सिपाडोलस्थित हाल करिब पाँच करोड लागतमा डोलेश्वर महादेवको मूल मन्दिर निर्माण भइरहेको हो । त्यसको लागि संखुवासभाको चैनपुर निवासी कृष्णगोपाल श्रेष्ठको परिवारले पाँच करोड रुपैयाँ सहयोग गर्ने प्रतिबद्धता गरेको थियो । जसअनुसार दुई करोड रुपैयाँको काम भइसकेको सचिव थापाले बताए ।
मन्दिरको चौघेरा सत्तलको ढलान भइसकेको छ । त्यस्तै धर्मशाला एवं समितिका सचिवालय भवन पनि निर्माण भइरहेको छ ।
यसैबीच डोलेश्वर महादेव संरक्षण तथा विकास समितिको अध्यक्षमा बालहरि चालिसे चुनिएका छन् । समितिको शनिबार राति सकिएको दशौं वार्षिक साधारणसभाले चालिसेको अध्यक्षतामा १७ सदस्यीय नयाँ कार्यसमिति चुनेको हो । जसअनुसार समितिको वरिष्ठ उपाध्यक्ष सूर्यबहादुर खाइतू, उपाध्यक्षमा मोहन गिरी, महिला उपाध्यक्षमा निर्मला सञ्जेल, महासचिवमा धर्मराज बस्नेत, सचिवद्वयमा विश्वराम थापा र हरिशरण बस्नेत, कोषाध्यक्षमा मोहन बल्ल तथा सह–कोषाध्यक्षमा दिलीप केसी निर्विरोध निर्वाचित भए ।
आठ सदस्यहरु भने निर्वाचनमार्फत चुनिएका छन् । विधानअनुसार आठ सदस्य निर्वाचित हुनुपर्नेमा २० जनाले उम्मेदवारी दिए । सदस्यहरुको
निर्वाचन भएकाले परिणाम शनिबार अबेरमात्रै घोषणा गरिएको थियो ।
निर्वाचन परिणामअनुसार कविराम थापा, राजनकाजी त्वाती, गीता थापा, विनोद भट्टराई, सुनिता थापा, मुकुन्द शर्मा, केदारप्रसाद उपाध्याय र दीपक बस्नेत बढी मत ल्याएर निर्वाचित हुन सफल भए ।
समितिका नवनिर्वाचित सचिव विश्वराम थापाका अनुसार समितिका दुई हजार नौसय ८१ आजीवन सदस्य छन् । जुन मतदान गर्न योग्य छन् तर शनिबार भएको निर्वाचनमा एकहजार एकसय २१ जानले मात्रै मतदान गरे । जसमा ३४ मत बदर भएको सचिव थापाले जानकारी दिए ।
प्रतिक्रिया दिनुहोस !
