पोखरा : खेल सुरु भएको २६ सेकेण्डमै सन्तोष श्रेष्ठले गरेको एक मात्र गोलको मद्दतले सशस्त्र प्रहरीको एपीएफ क्लवले थ्रीस्टार क्लबलाई पन्छाउँदै पोखरामा जारी मनकामना केबलकार पोखरा कपको सेमिफाइनलमा प्रवेश गरेको छ ।
श्रेष्ठले प्रतियोगिताकै कम समयमा गोल गर्दै थ्रीस्टारलाई सुरुमै सरपाइज मात्र दिएन दबाबमा समेत पारेको थियो ।
पोखरा रंगशालामा आइतबार भएको खेलमा थ्रीस्टार क्लबलाई १–० गोलले पराजित गर्दै एपीएफ पोखरा कप प्रतियोगितामा पहिलो सेमिफाइनलमा प्रवेश गर्ने टीम बनेको छ । राजिव लोप्चनले दिएको पासलाई उपयोग गर्दै श्रेष्ठले डिबक्सभित्रबाट सेकेन्डबार च्याप्दै प्रहार गरेको बल बिपक्षी गोलरक्षक एलन न्यापानेको हातमा टच हुँदै जाली चुमेको थियो ।
उद्घाटन खेलमा हिमालयन शेर्पा क्लबलाई २–१ गोल अन्तरले पराजित गर्दै एपीएफ क्वाटर फाइनलमा प्रवेश गरेको थियो । थ्रीस्टार क्लब भने वाई पाएर सिधै क्वाटरफाईनलमा एपीएफ सँग भेट गरेको हो ।
एक गोलले पछि परेको थ्रीस्टारका लागि खेलको पाँचौं मिनेटमा सुनिल बलले प्रहार गरेको बल खेर गएको थियो । यसै गरी खेलको ४८ औं मिनेटमा बुद्धराज लिम्बुले सेकेण्डबार च्याप्दै हानेको बल बारमा लागेर बाहिरिएको थियो ।
यसैगरी खेलको ५९ औं मिनेटमा रञ्जिन धिमालले प्रहार गरेको बलले पनि खेर गएको थियो । थ्रीस्टारले खेलका अन्तिम समयमा पाएका केही राम्रा अवसर पनि खेर फालेको थियो ।
एपीएफले पनि गोल थप्ने केही अवसर खेर फालेको थियो । खेलको २६ औं मिनेटमा सशस्त्रका राजीव लोप्चनले हानेको प्रहार सेकेण्ड बार नजिकैबाट बाहिरिएको थियो । यसैगरी खेलको ५७ औं मिनेटमा लोप्चनले नै हानेको बल बिपक्षि गोलरक्षकले बचाउ गरे । खेलमा ‘म्यान अफ दि म्याच’ को पुरस्कार सशस्त्र प्रहरीका डिफेन्स रमेश दंगालले पाए ।
खेलपछि प्रतिक्रिया दिदै थ्रीस्टार क्लबका प्रशिक्षक खेलको पहिलो मिनेटमै सरप्राइज गोल खाएपछि दबाबमा परेको सुनाए । विपक्षीको सुरुवाती अग्रतापछि रोक्ने रणनीति सफल भएको उनले बताए ।
आफ्ना खेलाडीले पाएका केही अवसर सदुपयोग गर्न नसकेको उनकाे भनाइ छ । एपीएफका प्रशिक्षक राजेन्द्र तामाङले खेलाडीले आफ्नो रणनीतिअनुसार खेल्दा सफलता मिलेको बताए ।
पहिलो मिनेटमै भएको गोललाई सरप्राइज गोल भन्दै त्यसपछि विपक्षीलाई रोक्ने रणनीति सफल भएको पसन सुनाए । जारी पोखरा कप अन्तर्गत भाेलिको खेल क्यारुनको डफिन्स टिम फेमिली र विभागीय टीम त्रिभुवन आर्मी क्लबबीच हुनेछ ।
प्रतिक्रिया दिनुहोस !
