सिरहा : गतवर्ष साउनको बाढीबाट प्रभावित चार हजार परिवारलाई राहत वितरण गरिएको छ । नेपाल रेडक्रस सोसाइटी सिरहा शाखामार्फत राहत वितरण गरिएको हो । राहत पाउनेमा १२ स्थानीय तहका आंशिक र पूर्ण प्रभावित परिवार छन् । राहत सामग्री चीन सरकारको सहयोगमा संयुक्त राष्ट्र संघीय विकास कार्यक्रमबाट प्राप्त भएका हो ।
जिल्लाको भगवानपुर, सखुवानन्कारकट्टि, नवराजपुर, बरियारपट्टि, औरही गाउँपालिका र सुखिपुर, लहान, धनगढीमाई, कर्जन्हा, मिर्चैया, कल्याणपुर, सिरहा नगरपालिका गरी १२ स्थानीयका पीडितपरिवारलाई राहत वितरण गरिएको हो । बाढी प्रभावित प्रतिपरिवारलाई उलन सल २ थान, ब्ल्याङकेट ३ थान, प्लास्टिक बाल्टिन, मग, कटन दरी, सुपानेट झुल २ थान, फलामको धुँवारहित चुलो, पानी छान्ने फिल्टर र हाइजिन किट सामग्री वितरण गरिएको सिरहा रेडक्रस सभापति राजदेव यादवले जानकारी दिए । यी सामग्रीको मूल्य प्रतिपरिवार १० हजार पर्ने गरी ४ करोड रुपैयाँ बराबरको छ ।
तत्कालीन सयममा बाढीबाट पूर्णरूपमा पीडित १ हजार ६ सय २३ परिवारमध्ये १ हजार ३ सय ५५ घरपरिवारका ७ हजार १ सय ३२ सदस्यलाई एक महिनाको खाजा र खाना वापत ७० रुपैयाँ प्रति सदस्य गरी जिल्ला प्रशासन कार्यालयबाट १ करोड ४९ लाख ७७ हजार २ सय उपलब्ध गराइएको थियो । पुनः १ हजार ३ सय ५५ परिवारमध्ये ९ सय ३३ घर परिवारलाई स्थानीय तहमार्फत पीडितको बैंक खातामा २५ हजारका दरले २ करोड ३३ लाख २५ हजार रुपैयाँ वितरण गरिएको थियो । सम्बन्धित स्थानीय तहमार्फत ४ सय २२ घर परिवारको बैंक खाता उपलब्ध नहुँदा उनीहरू राहत पाएको थिएन ।
त्यसैगरी पूर्णपीडित २ सय ६८ परिवार छुटेका थिए । आंशिक प्रभावित ३ सय ७ सय ३२ र छुट भएका ४ सय २२ र २ सय ६८ गरी चार हजार परिवारलाई राहत वितरण गरिएको हो । छुट भएका घरपरिवारले आर्थिक सहयोग नपाए पनि गैर खाद्य सामग्री तत्कालीन समयमा पनि पाएको रेडक्रस सिरहाका कार्यक्रम संयोजक अशोक यादवले बताए । जिल्ला विपद् व्यवस्थापन समितिको निर्णय अनुसार राहत वितरण गरिएको हो ।
प्रतिक्रिया दिनुहोस !
