काठमाडौं : प्रमुख प्रतिपक्षी दल नेपाली कांग्रेसले नेकपा नेतृत्वको सरकारविरुद्ध सोमबार देशैभर प्रदर्शन गरेको छ। नेपाली कांग्रेस काठमाडौँ समितिले रत्नपार्कको शान्तिबाटिकामा वाइडबडी जहाजको डमी बोकेर प्रदर्शन गरेको हो ।
कांग्रेस नेता प्रकाशमान सिंहको अगुवाइमा भएको विरोध कार्यक्रममा वाइडबडीका भ्रष्टाचारीलाई कारबाही, निर्मला पन्तका बलात्कारी र हत्यारालाई कारबाही र ३३ किलो सुनकाण्डका गिरोहलाई कारबाही माग गर्दै शान्तिवाटिकामा विशाल प्रदर्शन गरेको हो ।
भ्रष्टाचार र विभिन्न आपाराधिक गतिविधिमा सरकार नै मुछिएको भन्दै कांग्रेस कार्यकर्ताहरुले कार्टुन, चित्र र प्लेकार्ड बोकेर प्रदर्शन गरेका हुन् । उनीहरुले 'प्रधानमन्त्री ओलीजी ! वाइडबडी काण्ड कता हरायो ?', 'भ्रष्टाचारीको घेराबन्दीमा सरकार रमायो' नारा लेखिएका प्ले कार्डसहित प्रदर्शन गरेका हुन् ।
काठमाडौंको प्रदर्शनमा पूर्व महामन्त्री प्रकाशमान सिंहसहितका नेताहरुले सम्बोधन गरेका हुन् । नेता सिंहले नेकपा सरकार अलोकतान्त्रिक बाटोमा तानाशाही शैलीले अघि बढेको आरोप लगाए ।
प्रतिक्रिया दिनुहोस !
