भत्किएको पुलनिर्माणमा ढिलासुस्ती

  डडेल्धुरा : डँडेल्धुराको भागेश्वर–४, डुङरी र अजयमेरु गाउँपालिका–५ देवलदिव्यपुर जोड्न बनाउँदै गरेको पुल भत्केपछि पुनः निर्माण सुरु हुन सकेको छैन ।

गत साउन १० गतेको अविरल वर्षाका कारण उक्त निर्माणाधीन पुल भत्किएको थियो । साउनमा पुल भत्किएको भए पनि हालसम्म सामान्य काम पनि नसकिएको स्थानियले बताएका छन । डिभिजन सडक कार्यालय कुलपाते, दिपायलले पुलनिर्माणका लागि २०७२ भदौ २४ गते बिकोई बिल्र्डस प्रा.लि.सँग ठेक्का सम्झौता गरेको थियो ।
भ्याट सहितकूल ५ करोड एक लाख रुपैयाँमा ठेक्का सम्झौता गरेको निर्माण कम्पनीलाई पुल निर्माण कार्य सम्पन्न गर्न दुई वर्षको समयावधि तोकिएको थियो । २०७४ भदौ २४ गते ठेक्का अवधि सकिए पनि २०७५ भदौ ९ गतेसम्म काम सक्ने गरी म्याद थप गरिएको थियो । तर पुल नबन्दै भत्किएको थियो । 
अहिले छ÷सात महिना बितिसक्दा पनि पुल नबन्दा स्थानीयहरु मर्कामा परेका छन । ‘हामीलाई आवत–जावत गर्न असहज भइरहेको छ, पुल बनिसक्यो भनेर खुशी मनाउने अवसर नै नपाई भत्किएपछि दुःख लागेको छ’ देवलदिव्यपुरका टेक खड्काले भने ।
तर डिभिजन सडक कार्यालय कुलपाते, डोटीले भने पुल निर्माणको काम सुरु भइसकेको दाबी गरेको छ । ‘पुल भत्किएको केही समय पछि नै निर्माणको काम शुरु भइसकेको हो, सरसमान नआएकाले केही ढिलाई भएको होला’ डिभिजन सडक कार्यालय डोटीका इन्जिनियर महानन्द जोशीले भने । 
निर्माण अवधि सकिएकाले आफुहरुले पनि निर्माण व्यवसायीलाई दबाब दिइरहेको उनले बताए । निर्माण कम्पनीले भने झण्डै एक करोड रुपैयाँ क्षति व्यहोर्नु परेको जनाएको छ ।
मंसिरसम्म पुल निर्माण कार्य सक्ने गरी पुनःर्निर्माण गरिने सहमति भए पनि ढिलासुस्ती भइरहेको गाउँपालिका अध्यक्ष उमेशप्रसाद भट्टले बताए । 
४० मिटर लम्बाई र ११ मिटर चौडाई रहेको सो पुल समयमै निर्माण हुन नसक्दा स्थानीयले सास्ती खेप्नु परिरहेको स्थानिय बसन्ती पालले बताईन  ।