बझाङ : मुलुकका ठूला नेता सामान्य औषधिउपचार गर्न पनि विदेश गएर करोडौं सरकारी रुपैयाँ खर्चेका बेलामा सुदूर पश्चिमको दुर्गम इलाकाकी एक महिलाले सुत्केरी हुँदा सामान्य उपचार नपाएर मृत्युवरण गर्न बाध्य भएकी छिन् ।
बझाङको खप्तडछान्ना गाउँपालिका–५ बडाकोट घर भएकी ४० बर्षीय जलीदेबी थापाको सुत्केरी भएपछि उच्च रक्तश्राबका कारण मृत्यू भएको हो । आइतबार राति घरमा खाना खाएपछि व्यथा लागेकी थापालाई स्थानीय पाटादेवल स्वास्थ्य चौकीको प्रसूति केन्द्रमा लैजादै गर्दा बाटोमा नै सुत्केरी भएकी थिइन् ।
थापालाई आफन्तहरुले घरमा ल्याएपछि उच्च रक्तश्राव हँुदा मध्यरातमा नै उनको मृत्यू भएको आफन्त मुकेश थापाले जानकारी दिए । वडाकोटबाट पाटादेबल स्वास्थ्य चौकीको प्रसूति केन्द्रमा जान ३ घण्टाको पहाडको ओरालो पैदल बाटो हिंड्नुपर्छ । गाउँमा पनि दक्ष स्वास्थ्यकर्मी नहँुदा उपचार हुन नसकेपछि उनको मृत्यू भएको हो ।
मृतककी श्रीमान रोजगारीका लागी भारत गएका छन् भने घरमा उनका दुई छोरा र एक छोरी छन् । थापाले छोरी पाएकी हुन् । छोरीको अवस्था सकुशल रहेको परिवारले बताएका छन् । यसअघि पनि पटक–पटक सामान्य स्वास्थ्य समस्या पर्दासमेत यहाँका स्थानीयहरुले स्वास्थ्य चौकी टाढा हुँदा निकै समस्या झेल्दै आएका आएका थिए ।
तीन सय परिबार रहेको बयाना, बडाकोट गाउँमा प्रसूति केन्द्रका लागि महिलाहरुले बारम्बार पहल गरेको भएपनि हालसम्म स्थापना हुन सकेको छैन ।
प्रतिक्रिया दिनुहोस !
