डोटी : दिपायलमा नेपाली सैनिकका जवानले दान गरेको रगतका कारण एक सुत्केरी महिलाको ज्यान जोगिएको छ । नेपाली सेनाको सर्वेश्वर गणका प्युठ भूपेन्द्र चन्द र सिपाही विक्रम सिंहले दिएको रगतले केआइसिंह गाउँपालिका-४ तिखातरकी २२ वर्षीया पार्बती जेठाराको ज्यान जोगिएको हो ।
सुत्केरी व्यथाले च्यापेर दिपायलस्थित शैलेश्वरी अस्पतालमा भर्ना भएकी जेठाराको अत्यधिक रक्तश्रावका कारण ज्यान जोखिममा परेको थियो । यस्तो स्थितिमा नेपाली सैनिकले दुईपिन्ट 'ए पोजेटिभ' रगत दिएकाले निजको ज्यान जोगिएको अस्पतालका निर्देशक आइजङ्ग कुँवरले बताए ।
'शरीरमा रगत सकिएर महिलाको ज्यानै खतरामा परेको थियो तर बेलैमा रगत उपलब्ध भएपछि उनको ज्यान जोगियो', उनले भने । नेपाली सेनाले डोटीमा विगतदेखि नै स्थानीयवासीलाई समस्या परेको बेला रगत उपलब्ध गराउँदै आएको छ । रासस
प्रतिक्रिया दिनुहोस !
