सिरहा : प्रहरीले मंगलबार सिरहाका छुटाछुटै दुई स्थानबाट लागुऔषधसहित चारजनालाई पक्राउ गरेका छन्। सशस्त्र प्रहरी र नेपाल प्रहरीको संयुक्त टोलीले चेकजाँचको क्रममा सिरहा नगरपालिका १७ पटेर्वाबाट एक जनालाई र नेपाल प्रहरीको अर्को टोलीले सिरहा नगरपालिका १५ बाट तीन जनलाई लागुऔषधसहित पक्राउ गरेको हो।
धनुषाको जनकनन्दनी गाउँपालिका २ का १९ वर्षीय बब्लुकुमार यादवलाई संयुक्त प्रहरी टोलीले स ९ प ५४३१ नम्बरको पल्सर मोटरसाइकलमा लागुऔषध लिएर भारतबाट नेपाल आउँदै गर्दा पक्राउ गरेका छन्।
प्रहरीले उनको साथबाट फेनारगन १९९ एम्पुल, डाइजिल्याब १९९ एम्पुल र नुफिन २०० एम्पुल बरामद गरेको जिल्ला प्रहरी कार्यालय सिरहाका एसपी जिवन श्रेष्ठले जानकारी गराए।
१५ मिनेटकै फरकमा प्रहरीको अर्को टोलीले सिरहा नपा १५ बाट चेकजाँचको क्रममा उदयपुरको कटारी नगरपालिका ४ का ३४ वर्षीय बाबा तामाङ, सिरहा नपा १ का २१ वर्षीय गणेश पासमान र सोही ठाउँका १८ वर्षीय राजेश पासमानलाई १४ पिस नाइट्रोभेट ट्याब्लेटसहित पक्राउ गरेको छ। यिनीहरु पनि भारतबाटै लागुऔषध लिएर आउँदै थियो।
सिरहा प्रहरीले हिजा (सोमबार) पनि लागुऔषसहित नरहा गाउँपालिका ३ स्थित नयाँ चोहर्वाबाट गोलबजार नगरपालिका ८ का २२ वर्षीय दिपेन्द्र यादव र उदयपुरको कटारी नगरपालिका १ का २५ वर्षीय गोकर्ण थापालाई पक्राउ गरेको थियो।
चेकजाँचको क्रममा स २ प ४४७९ नम्बरको मोटरसाइकल आएका दुवै जनाको साथबाट प्रहरीले डाइलेक्स डिसी ९१ बोतल, नाइट्रोसन २० चक्की र पेन्टालब २१ एम्पुल लागुऔषध बरामद गरेको थियो। थप अनुसन्धान गरिरहेको र उनीहरुलाई लागुऔषध तथा ओसार पोसार मुद्दामा अदालतमा पेश गर्ने एसपी श्रेष्ठले बताए।
प्रतिक्रिया दिनुहोस !
