चौतारा : नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले सरकारले बितेको एक वर्षमा पर्याप्त काम गरेको दाबी गरेका छन् ।
चौतारा साँगाचोकगढी नगरपालिका–४ कुबिन्डेस्थित सेतीदेवी पञ्चकन्या माविको वार्षिकोत्सवमा बोल्दै दाहालले बाहिर नदेखिए पनि सरकारले धेरै परिवर्तन गरेको बताएका हुन् । ‘बाहिर देखिएको छैन तर युगान्तकारी परिवर्तन भएको छ’, दाहालले भने, ‘मुलुकको समृद्धितर्फ सरकारले काम गरिरहेको छ ।’
उनले सरकारको कामबाट अत्तालिएर अनावश्यक विरोध आउन थालेको बताए । कम्युनिष्ट पार्टीको एकीकरणसँगै अबको १० वर्षमा राजनीति पूरा सफा गरेर विकासको गतिमा जाने प्रतिज्ञा लिएको तर्क राखे ।
नेपाललाई भारत र चिन दुबैतर्फबाट रेलमार्गले जोड्ने काम अघि बढिसकेको दाहालले बताए । निर्वाचनपछि सरकारले आबश्यक सबै ानुन निर्माण गरिसकेकाले अब विकासको गतिमा जाने मात्र काम बाँकी रहेको उनको धारणा थियो । ‘गरिबीको कारणले पढ्न र उपचार नपाउने अबस्थाको अन्त्य भएको छ’, नयाँ बनेको कानुनको प्रशंसा गर्दै भने, ‘आर्थिक अभावका कारण उपचार नपाउने र पढ्न नपाउने अबस्था आएमा सरकारले नै लगानी गरिदिनुपर्ने कानुन पारित भइसकेको छ ।’
निजी विद्यालयलाई बिस्तारै नियन्त्रण गर्दै सामुदायिक विद्यालयको गुणस्तर र पूर्वाधार बिस्तारमा सरकार अघि बढेको उनको भनाई थियो । सरकार शिक्षालाई राजगारीसँग जोड्ने नीति बनाउन लागेको दाहालले जानकारी दिए ।
कार्यक्रममा नेकपाका स्थायी समिति सदस्य अग्निप्रसाद सापकोटाले मुलुक आर्थिक समृद्धिको बाटोमा अघि बढ्न थालेको बताए । उनले शैक्षिक क्षेत्रको विकासले मुलुकको समग्र विकासको बाटो खुल्ने भएकाले यस क्षेत्रको विकासका लागि निरन्तर लागिपर्नुपर्ने धारणा राखे ।
प्रतिक्रिया दिनुहोस !
