काठमाडौं : द्वन्द्वपीडित सुरक्षाकर्मीका परिवारले सुरक्षाकर्मीतर्फका सहिद परिवारलाई सुविधा र सम्मानको माग गरेका छन् ।
द्वन्द्वका क्रममा मारिएका सेना, सशस्त्र प्रहरी, नेपाल प्रहरी र गुप्तचरलगायतका सुरक्षाकर्मीलाई सहिद घोषणा गरेको भए पनि अन्य सहिद परिवारलाई उपलब्ध गराएको आर्थिक सहयोग, शिक्षा, स्वास्थ्य, रोजगारीलगायत क्षेत्रमा आरक्षणको व्यवस्था गर्न माग गरेका हुन् ।
माइतीघरमा आज आयोजित विरोध प्रदर्शनमा द्धन्द्धपीडित सुरक्षाकर्मीको संस्थाका सदस्य नवराज श्रेष्ठले देश र जनताको सुरक्षाका लागि खटिएका सुरक्षाकर्मीले द्वन्द्वका क्रममा मृत्युवरण गरेका कारणले सरकारले उनीहरुलाई सहिद घोषणा गरेकामा खुसी व्यक्त गर्दै उनीहरुका परिवारलाई आवश्यक सुविधा उपलब्ध गराउन माग गरे ।
संस्थाका सदस्य मञ्जु गिरीले शहादतप्राप्त चारै निकायका सुरक्षाकर्मीलाई सरकारले हालै सहिद घोषणा गरेकामा त्यसको स्वागत गर्दै सरकाको उक्त घोषणाले राष्ट्रसेवक योद्धालाई सम्मान भएको र उनीहरूका परिवारलाई हौसला मिलेको बताइन् । उनले घाइते, अशक्त सुरक्षाकर्मीलाई अशक्तता प्रतिशतका आधारमा आर्थिक राहत दिनुपर्नेमा जोड दिइन् ।
१० वर्षसम्म भएको द्वन्द्वका क्रममा दुई हजार बढी सुरक्षाकर्मीले शहादत प्राप्त गरेकामा सरकारले केही साताअघि उनीहरुलाई सहिद घोषणा गरेको थियो ।
–रासस
प्रतिक्रिया दिनुहोस !
