सचिवलाई झापड प्रकरण : अख्तियारले थाल्यो उद्यम कार्यक्रमको अनुसन्धान

जनकपुरधाम : गरिबी निवारणका लागि लघु उद्यम विकास कार्यक्रममा आर्थिक अनियमितता भएको भन्दै अख्यितारले अनुसन्धान सुरु गरेको छ । 

प्रदेश–२ सरकारले संचालन गर्न संस्था छनोटका फाइल झिकाएर अख्तियार दुरुपयोग अनुसन्धान आयोग बर्दिबासले छानबिन सुरु गरेको हो । 

आर्थिक चलखेलका कारण मन्त्रीले सचिवलाई झापड हानेपछि  अख्यिारमा उजुरी परेको थियो । विवादित उद्यम कार्यक्रमको सबै कागजपत्र झिकाउन अख्तियारले माघ १६ गते पत्रचार गरेको थियो ।

एनजीओमार्फत् प्रदेश २ का आठ जिल्लामा आठ करोडको उद्यम कार्यक्रम संचालन गर्ने योजना थियो  । उद्योग, पर्यटन, वन तथा वातावरण मन्त्रालयले प्रस्ताव आह्वान गर्दा  एक सय ९३ गैरसरकारी संस्थाले दरखास्त दिएका थिए । मापदण्ड पूरा गर्ने ४६ एनजिओ छनोट सूचीमा परेका थिए ।

आफ्नो निकट गैरसरकारी संस्थालाई छनोट नगरेको आक्रोशमा आर्थिक मामिला तथा योजनामन्त्री विजय यादवले  उद्योग, पर्यटन, वन तथा वातावरण मन्त्रालयका सचिव विद्यानाथ झालाई कुटपिट गरेका थिए । 

मन्त्रीले कमिसन लिएर गैरसरकारी संस्था छनोट गराइदिने एनजिओ संचाललकलाई आश्वासन दिएका थिए । तर, छनोट सूचीमै मन्त्रीले सिफासिर गरेको सिरहास्थित लहानको सगरमाथा स्रोत विकास केन्द्र नपरेपछि मन्त्री यादव सचिवमाथि खनिएका थिए ।

मन्त्री यादवले सचिव झालाई पुस २९ गते झापड लगाएसँगै उद्यम कार्यक्रमको छानबिन अख्यितारले थालेको श्रोतले जनाएको छ । घटनापश्चात मुख्यमन्त्री तथा मन्त्रिपरिद्को कार्यालयले उद्यम कार्यक्रमका सबै प्रक्रिया हाललाई स्थगित गर्न निर्णय गरेको थियो । 

संघीय सरकारको शसर्त अनुदानमा गरिबी निवारणको लागि उद्यम कार्यक्रमका लागि प्रदेश २ को उद्योग, पर्यटन, वन तथा वातावरण मन्त्रालयले आशयपत्र आह्वान गरेको थियो । 
 
मन्त्रालयले मंसिरको दोस्रो साता गैर सरकारी संस्था(एनजिओ)लाई आशयपत्र बुझाउन आह्वान गरेको थियो । गत पुस २६ गते छनोटमा परेको गैरसकारी संस्था सूची निकालिएको थियो ।

प्रदेश २ को सरकारले ८ जिल्लामा उद्यमका लागि क्षमता अभिवृद्धि कार्यक्रम लागू गर्न छनोट भएका एनजीओमध्ये धेरैजसो प्रदेश २ बाहिरका परेको र आफूले सिफारिस गरेको एनजीओ नपरेपछि मन्त्रीहरू रुष्ट बनेका थिए । त्यही क्रममा भएको विवादमा मन्त्री यादवले सचिवमथि झापड हानेका थिए ।