धनगढी : धनगढी प्रिमियर लिग (डिपिएल) तेस्रो संस्करणको ट्रफी सार्वजनिक गरिएको छ । धनगढीमा एक कार्यक्रम गरेर सबै क्लबका प्रतिनिधि खेलाडीसहित आयोजक धनगढी क्रिकेट एकेडेमीका अध्यक्ष सुवास शाही र डिपिएलका सदभावना दूत जोन्टी रोडले संयुक्तरुपमा ट्रफी सार्वजनिक गरे ।
जन्टी रोड दक्षिण अफ्रिकाका पुर्व खेलाडी तथा प्रशिक्षक हुन् । उनी फिल्डिङका विज्ञ हुन् । डिपिएलमा उनी मुख्य आकर्षण रहनेछन् । ट्रफी सार्वजनिकका क्रममा तेस्रो संस्करणको धनगढी प्रिमियर लिगलाई केही विशेष बनाउन लागिएको छ । पुरस्कार राशी पनि बढाएर ३० लाख पुर्याइएको आयोजकले जनाकारी दिएको छ ।
डिपिएलको तेस्रो संस्करणमा उत्कृष्ट खेलाडीलाई दिइने गोल्डस्टार सुनको स्पाइक पनि सार्वजनिक गरिएको छ । डोल्डन स्पाइकको धनगढी क्रिकेट एकेडेमीका अध्यक्ष सुवास शाही र डिपिएलका सदभावना दूत जोन्टी रोडले सार्वजनिक गरे ।
डिपिएल तेस्रो संस्करणमा स्थानीय टोली धनगढी स्टार्स, सिवाईसी अत्तरिया, महेन्द्रनगर युनाइटेडसँगै काठमाडौँ, विराटनगर र रुपन्देहीले प्रतिस्पर्धा गर्नेछन् ।
दुई दिन सर्यो
प्रतिकुल मौसमका कारण मैदान हिलाम्य भएपछि शनिबारबाट सुरु हुने भनिएको धनगढी प्रिमियर लिग दुई दिन पछाडि धकेलिएको छ ।
सुदूरपश्चिम क्षेत्रबाट नेपाल प्रवेश गरेको मनसुनी हावाले यस क्षेत्रमा दुई दिनदेखि वर्षा भइरहेको छ । विहीबार राती भएको वर्षाले फाप्ला क्रिकेट मैदान हिलाम्य भएपछि प्रतियोगिता दुई दिन पछाडि सारिएको हो ।
दुई संस्करण संघीय प्रहरी कार्यालयको खेल मैदानमा भएको डिपिएलको तेस्रो संस्करणका लागि फाप्ला क्रिकेट मैदान तयार पारिएको थियो । मोहना नदीको किनारमा रहेको जग्गामा बनाइएको फाप्लामा गतवर्ष मात्रै माटो भरिएकाले बर्षाले हिलाम्य भएको छ ।
हिलाम्य मैदानमा क्रिकेट खेलाउन समस्या भएकाले प्रतियोगिता एक दिन सारिएको हो । यद्यपि आयोजकले यसको आधिकारिक घोषण गरेको छैन । सबै खेलको प्रत्यक्ष प्रसारण एपीवान टेलिभिजनले गर्नेछ ।
अत्तरियाको जर्सी
डिपिएलको स्थानीय टोली सिवाईसी अत्तरियाले जर्सी सार्वजनिक गरेको छ । धनगढीमा एक कार्यक्रमको आयोजना गर्दै विदेशी प्रशिक्षक रायन मारुन र डिपिएलका सदभावना दुत जोन्टी रोड्सको उपस्थितिमा अत्तरियाले जर्सी सार्जजनिक गरेको हो ।
जर्सी सार्जजनिक कार्यक्रममा अत्तरियाका कप्तान दिपेन्द्रसिंह ऐरीले प्रतियोगिताका लागि टोली तयार रहेको बताए । उनले यसपाली उपाधी कब्जा गर्ने दाबी गरे । जर्सी सार्वजनिक कार्यक्रममा टिमका मालिक नरबहादुर राई र गोल्डेन गेट कलेजका सञ्चालक युवराज शर्मासहित उपस्थित थिए ।
प्रतिक्रिया दिनुहोस !
