काठमाडौं : वीर गणेशमान सिंह राष्ट्रिय बक्सिङ प्रतियोगिताको महिलातर्फको उपाधि त्रिभुवन आर्मी क्लबले जितेको छ। आर्मीले तीन स्वर्ण, दुई रजत र एक कांस्य जित्यो। विजेतालाई गणेशमान सिंह फाउन्डेसनका अध्यक्ष प्रकाशमान सिंह, राष्ट्रिय खेलकुद परिषद्का सदस्यसचिव केशवकुमार विष्ट, प्रतियोगिता संयोजक राजीव श्रेष्ठले पुरस्कार प्रदान गरे।
शुक्रबार भएको फाइनलमा ६०-६४ केजी तौलसमूहमा आर्मीका पुनम रावलले एपीएफकी सरस्वती रानालाई पराजित गरिन्। ५४-५७ केजीमा आर्मीकी चन्द्रकला थापाले एपीएफकै सुलभ थापामगरलाई हराउँदा ५१-५४ केजीमा आर्मीकी मीनु गुरुङले नेपाल पुलिस क्लबकी निशा तामाङलाई पराजित गरिन्।
एपीएफका लागि संगीता सुनार र माला राईले स्वर्ण पदक जिते। संगीताले ५७-६० केजी तौलसमूहमा आर्मीकी सविना श्रेष्ठलाई हराइन्। मालाले ४८-५१ केजीमा आर्मीकै विमला श्रेष्ठलाई पराजित गरिन्। ४६-४८ केजी तौलसमूहमा पुलिसकी दिवाना शेर्माले आफ्नो विभागका लागि एकमात्र स्वर्ण पदक जित्ने क्रममा प्रदेश ५ की सुशीला थापालाई पराजित गरिन्।
यसैगरी पुरुषको ४९ केजीमा एपीएफक प्रदीप महर्जनले प्रदेश ७ का भानु विष्ट तथा आर्मीका सुशील थापाले प्रदेश ६ का मोहन गुरुङलाई पराजित गर्दै फाइनलमा स्थान बनाए। आर्मीकै प्रेम चौधरीले ५२ केजी तौलसमूहमा प्रदेश १ का सुलभराज तुलाधरलाई हराए। एपीएफका विक्रम परियारले पुलिसका चन्द्रबहादुर थापालाई हराउँदै फाइनलमा स्थान बनाए।
शुक्रबार भएको खेलमा त्रिभुवन आर्मी र नेपाल पुलिस क्लबका खेलाडी प्रतिस्पर्धा गर्दै । तस्बिर : दीपेन श्रेष्ठ
एपीएफका पुरन राई प्रदेश २ का गणेश थापालाई हराउँदै ५६ केजीको उपाधि नजिक पुगे। प्रदेश ७ का महेन्द्र चन्दलाई हराएका आर्मीका विमल रोकाले पुरनसँग फाइनलमा खेल्नेछन्। ६० केजी तौलसमूहमा आर्मीका एकबहादुर घलेले प्रदेश ५ का गणेश थापामगरबाट वाकओभर पाउँदै फाइनलमा स्थान बनाए। पुलिसका दिनेश श्रेष्ठले एपीएफका प्रकाश लिम्बूलाई हराउँदै एकबहादुरसँग उपाधि भिडन्त पक्का गरे।
पुलिसका भूपेन्द्र थापा र एपीएफक सोनाम सार्कीले ६४ केजी तौलसमूहको उपाधिका लागि खेल्नेछन्। भूपेन्द्रले आर्मीका सुरेश नेपालीलाई हराउँदा सोनामले प्रदेश ६ का इन्द्र सुनारलाई पाखा लगाए। ६९ केजीमा आर्मीका विष्णुप्रसाद घलेले प्रदेश १ का राजेश गुरुङलाई नकआउट गरे। एपीएफका विकास लामाले प्रदेश ३ का मनीष डंगोललाई हराउँदै उपाधि भिडन्त पक्का गरे।
यसैगरी ७५ केजी तौलसमूहमा एपीएफका सुमन कार्की र आर्मीका दीपक श्रेष्ठ फाइनल पुगेका छन्। सुमनले प्रदेश २ का दिवस गुरुङलाई हराउँदा दीपकले प्रदेश ३ का दिवेश भूमिलाललाई नकआउट गरेका थिए। आर्मीका रवि सुनारले प्रदेश ७ का हिक्मतबहादुर शाहीलाई हराउँदै ८१ केजीको फाइनलमा स्थान बनाए। उनलाई प्रदेश ५ का केशर खत्रीले चुनौती दिनेछन्। केशरले प्रदेश ४ का सुसन पुनलाई नकआउट गरेका थिए।
प्रतिक्रिया दिनुहोस !
