काठमाडौं : अन्तर्राष्ट्रिय क्रिकेट काउन्सिल (आईसीसी) ले नेपाली क्रिकेट खेलाडीको दुई वर्षको तलब निकासा गरेको छ। आईसीसीले क्रिकेट खेलाडीको तलब राष्ट्रिय खेलकुद परिषद् (राखेप) को खातामा पठाएको हो।
नेपाली क्रिकेटको नेतृत्वदायी निकाय नेपाल क्रिकेट संघ (क्यान) दुई वर्षभन्दा लामो समयदेखि आईसीसीको निलम्बनमा छ। आईसीसीले आन्तरिक बिबाद बढेको कारण देखाउँदै २०७३ साल वैशाख १२ गतेदेखि क्यानलाई आफ्नो सदस्यबाट निलम्बन गर्ने निर्णय लिएको थियो। क्यानलाई निलम्न गरे पनि आईसीसीले नेपाली खेलाडीलाई अन्तर्राष्ट्रिय प्रतियोगिता खेल्न भने रोक लगाएको छैन। क्यान निलम्बनमा परेपछि नेपाली क्रिकेट खेलाडीले पनि मासिक पारिश्रमिक पाउन सकेका थिएनन्।
‘आईसीसीले शनिबार नेपाली क्रिकेट खेलाडीको दुई वर्षको तलब राखेपको खातामा उपलब्ध गराएको जानकारीसहितको पत्र हामीलाई पठाएको छ’, राखेपका प्रेस सल्लाहकार रोहित दाहालले अन्नपूर्ण पोस्ट्सँग भने। राखेप सदस्यसचिव केशवकुमार बिष्टले पटकपटक पत्राचार गरेपछि आईसीसीले खेलाडीको तलब निकासा गरेको जानकारी दाहालले दिए। तलब निकासाका लागि खेलाडी र प्रमुख प्रशिक्षक जगत टमटाले पनि पहल गरेका थिए।
‘लामो समयदेखि क्यान आईसीसीको निलम्बनमा परेको छ। क्यान निलम्बनमा परेका कारण खेलाडीले पनि तलब पाउन सकेका थिएनन्। त्यसैले सदस्यसचिव ज्यूले खेलाडीको पारिश्रमिक उपलब्ध गराउन आईसीसीसँग पटकपटक पत्राचार गर्नु भएको थियो। यसका लागि खेलाडीले पनि पहल गरेका थिए। सोही अनुरुप आईसीसीले राखेपको खातामा खेलाडीको दुई वर्षको तलब उपलब्ध गराएको जानकारीसहित हामीलाई पत्र पठाएको हो’, प्रेस सल्लाहकार दाहालले भने।
हाल नेपालले आईसीसीबाट एकदिवसीय टोलीको मान्यता प्राप्त गरेको र अन्तर्राष्ट्रिय प्रतियोगितामा महत्वपूर्ण उपलब्धिहरु समेत हासिल गर्दै गएकाले खेलाडीको पारिश्रमिक बढाउने विषयमा राखेपले आवश्यक पहल थाल्ने तयारी भइरहेको जानकारी पनि दाहालले दिए। आईसीसीले खेलाडीको दुई वर्षको पारिश्रमिक वापत राखेपको खातामा एक करोड २७ लाख ८७ हजार सात सय ८२ रुपैयाँ पठाएको छ।
आईसीसीले तलब दिने खेलाडीलाई ‘ए’, ‘बी’ र ‘सी’ गरी तीन श्रेणीमा वर्गीकरण गरेको छ। ‘ए’ श्रेणीमा पर्ने खेलाडीले मासिक ३५ हजार रुपैयाँ, ‘बी’ श्रेणीमा पर्ने खेलाडीले मासिक २५ हजार रुपैयाँ र ‘सी’ श्रेणीमा पर्ने खेलाडीले मासिक १५ हजार रुपैयाँ तलब पाउने छन्।
वर्गीकरण अनुसार ‘ए’ श्रेणीमा पारस खड्का, ज्ञानेन्द्र मल्ल, शरद भेषवाकर, वसन्त रेग्मी, सन्दीप लामिछाने, सोमपाल कामी र दीपेन्द्रसिंह ऐरी रहेका छन्। ‘बी’ श्रेणीमा शक्ति गौचन, रोहितकुमार पौडेल, ललितनारायण राजवंशी, आरिफ शेख, करण केसी, ललित भण्डारी र अनिलकुमार शाह रहेका छन्।
यसैगरी ‘सी’ श्रेणीमा सुशन भारी, किशोर महतो, सुवाष खकुरेल, सागर पुन, दिलीप नाथ, सुनिल धमला र विनोद भण्डारी छन्। क्यानले सन् २०१५ देखि खेलाडीलाई तीन श्रेणीमा विभाजन गरी मासिक तलब दिन सुरु गरेको हो। पछिल्लो पटक क्रिकेट खेलाडीले सन् २०१७ को जुलाईमा तलब पाएका थिए।
‘ए’ श्रेणीमा परेका प्रत्येक खेलाडीले दुई वर्षको एकमुष्ट आठ लाख ४० हजार रुपैयाँ पारिश्रमिक पाउने छन्। ‘बी’ श्रेणीमा परेका खेलाडीले दुई वर्षको एकमुष्ट ६ लाख रुपैयाँ पाउने छन्। यसैगरी ‘सी’ श्रेणीमा पर्ने प्रत्येक खेलाडी दुई वर्षको एकमुष्ट तीन लाख ६० हजार रुपैयाँ हात पार्नेछन्।
क्यान निलम्बनमा परेपछि नेपाली क्रिकेटको ब्यवस्थापन सिधै आईसीसीले नै हेर्दै आएको छ। क्यान निलम्बनमा परेको दुई वर्ष नौ महिना पुगिसके पनि नेपाली खेलाडीले भने विभिन्न ठूला अन्तर्राष्ट्रिय प्रतियोगितामा सहभागिता जनाई उत्कृष्ट प्रदर्शन गर्दै आएको छ।
अघिल्लो सातामात्र नेपाली क्रिकेट टोलीले संयुक्त अरब इमिरेट्स (यूएई) लाई उसैको घरेलु मैदानमा २—१ ले हराउँदै एकदिवसीय अन्तर्राष्ट्रिय शृंखला जितेको थियो। आईसीसीबाट एकदिवसीय मान्यता पाएयताा नेपालले जितेको यो पहिलो एकदिवसीय शृंखला थियो। त्यसपछि यूएईलाई नै हराउँदै नेपालले तीन खेलको टीट्वेन्टी शृंखला पनि २—१ ले नै जितेको थियो।
प्रतिक्रिया दिनुहोस !
