बेंशीशहर : लमजुङको दोर्दी खोलामा निर्माणाधीन २७ मेगावाटको तल्लो दोर्दीखोला जलविद्युत् आयोजना निर्माण कार्य ८० प्रतिशत पूरा भएको छ ।
चालु आर्थिक बर्षमा निर्माणको सबै काम सकेर भदौमा विद्युत उत्पादन गर्ने लक्ष्य आयोजनाको छ । प्रवद्र्धक कम्पनी हिमालयन पावर पार्टनर लिमिटेडका कार्यकारी निर्देशक गुरुप्रसाद ढकालले आयोजनाको विद्युत् गृह, बाँध र सुरुङ निर्माणको काम अन्तिम चरणमा पुगेको बताए । ‘बाँधको संरचनाको काम सकिएको छ । गेट जडान र पाँचसय मिटर सुरुङ खन्न बाँकी छ’, ढकालले भने, ‘बाँकी रहेको काम चैतभित्र सक्छौँ ।’
दुई हजार सात सय ७० मिटर सुरुङबाट आएको पानी २ हजार ६ सय मिटर पेनस्टक पाइपबाट विद्युत गृहमा खसालिने आयोजनाले जनाएको छ । पेनस्टक जडानको कार्य भइरहेको ढकालले बताए । ढकालकाअनुसार विद्युत् गृहको काम अन्तिम चरणमा पुगेको छ । संरचना निर्माणको काम सकिएपछि चैतबाट इलेक्ट्रोमेकानिकल उपकरण जडानको काम हुन्छ । भदौ १५ सम्म विद्युत् उत्पादन गरि परिक्षणमा लगिने आयोजनाले जनाएको छ ।
२०७१ फागुनबाट शुरु भएको आयोजनाको निर्माण कार्य २०७४ असारसम्म सक्ने लक्ष्य थियो । भूकम्प, नाकाबन्दीलगायतका कारण आयोजना निर्माणमा ढिला भएको ढकालले बताए । दोर्दी गाउँपालिका ६ ढोडेनी र ८ बन्सारबीचको दोर्दी खोलामा बाँध बाँधेर बेसीसहर नगरपालिका ११ चिती रामचोक बेसीको मस्र्याङ्दी नदी किनारमा निर्माण गरिने विद्युत गृहमा पानी खसालिने छ ।
नदीप्रवाही यस आयोजनामा ९÷९ मेगावाटको तीनवटा फ्रान्सिस टर्बाइन जडान गरिने आयोजनाका इन्जिनियर दीपक ज्ञवालीले बताए । उत्पादित विद्युत् १ दशमलब २ किलोमिटरको दूरीमा रहेको उदीपुरस्थित निर्माणाधीन १३२ केभीको सव स्टेसनमा जोडिने छ ।
आयोजनाबाट १४ करोड ७६ लाख युनिट बिजुली उत्पादन हुनेछ । उत्पादित बिजुलीमध्ये आयोजनाले १४ करोड २३ लाख युनिट बिजुली बिक्री गर्ने प्रक्षेपण गरेको छ । २३ असार २०६८ मा लाइसेन्स पाएको सो आयोजनाले विद्युत् प्राधिकरणसँग सुख्खा याममा प्रतियुनिट ८ रुपियाँ ४० पैसा र वर्षायाममा ४ रुपियाँ ८० पैसामा आयोजनाले २०६९ असार १ गते विद्युत् खरिद–बिक्री सम्झौता (पीपीए) गरेको थियो ।
चार अर्ब २३ करोड ३५ लाख रुपियाँ आयोजना निर्माण पूरा हुने जनाएको छ । यसमा गैरआवासीय नेपालीद्वारा स्थापित एनआरएन इन्भेस्टमेन्ट लिमिटेडको ३५.७ प्रतिशत, आईएमई समूहको ३४.३० प्रतिशत र स्थानीयको ३० प्रतिशत लगानी छ । यसका लागि प्राइम कमर्सियल बैंकको अगुवाइमा आठवटा बैंक तथा वित्तीय संस्थाको ७५ प्रतिशत ऋण र प्रवद्र्धकको ३५ प्रतिशत शेयर छ ।
प्रतिक्रिया दिनुहोस !
