स्याङ्जा : सात सय कोल्मा बहाकोट सम्पर्क मञ्चद्वारा आयोजित प्रथम क्रस कन्ट्री राष्ट्रिय दौड प्रतियोगिताको उपाधि नेपाल आर्मीका राजन खत्रीले जितेका छन् । नेपाल आर्मीका हवल्दार ३५ वर्षीय खत्रीले ३१ किलोमिटर खुला दौड ३१ जना प्रतिस्पर्धीलाई पछि पार्दै १ घण्टा ५७ मिनेट ५९ सेकेन्डमा पार गरेका हुन् ।
पुतलीबजार नगरपालिका–९ कोल्मामा आयोजित प्रतियोगिताको उपाधिसँगै ओखलढुङ्गाका खत्रीले ५० हजार नगद जिते । यसअघि पनि खत्रीले विभिन्न दौड प्रतियोगितामा स्वर्ण पदक पाएको बताए ।
यसैगरी स्याङ्जाका भिरकोट नगरपालिका–५ का १९ बर्षिय अशोक थापा दोश्रो भए । उनले २ घण्टा ३ मिनेट ३१ सेकेण्डमा दौड पुरा गर्दै ४० हजार नगदसहित शिल्ड मेडल र प्रमाणपत्र हात पारेका छन् ।
जुम्लाका धिरबहादुर बुढाले तेस्रो स्थानसहित ३० हजार नगद तथा शिल्ड मेडल र प्रमाण पत्र हात पार्न सफल भए । बुढाले दौड २ घण्टा १० मिनेट ३ सेकेण्डमा पुरा गरे ।
यस्तैगरी, अण्डर २१ वर्ष १४ किलोमिटर दौडमा पुतलीबजार नगरपालिकाका कमलप्रसाद क्षेत्री प्रथम भएका छन् । उनले पनि ६४ जनालाई पछि पार्दै १ घण्टा १४ मिनेट ५२ सेकेण्डमा दौड पुरागरी २० हजार नगदसहित शिल्ड, मेडल र प्रमाणपत्र हात पारेका छन् ।
एक घण्टा १५ मिनेट ५२ मिनेटमा दौड पुरा गर्दै भिरकोटकै गणेश गुरुङले दोस्रो स्थानसहित १५ हजार नगद र बिरुवाका रुद्रबहादुर भुजेलले १ घण्टा १७ मिनट २३ दौड पुरा गर्दै तेस्रो स्थान सहित १० नगदसहित शिल्ड, मेडल र प्रमाण पत्र प्राप्त गरे ।
स्याङ्जाको पुतलीबजार नगरपालिका र बिरुवा गाउँपालिकासहित तनहुँको शुक्लागण्डकी नगरपालिकाका पछाडि परेका बस्तीहरुलाई खेलकुदको माध्यमबाट पर्यटन प्रर्वद्धन गर्ने उदेश्यले सात सय कोल्मा बहाकोट सम्पर्क मञ्चले प्रतियोगिता गरेको हो ।
दौड प्रतियोगिता कोल्माबाट शुरु भई काउले, डाडाँथर, राइपुर, नाम्चे, काल्खु, खुदी, हुदै पुन कोल्मा आएर समापन भएको थियो । प्रतियोगितामा बिजेता तथा सहभागी धावकलाई प्रतिनिधी सभा सदस्य नारायणप्रसाद मरासिनीले नगद सहित शिल्ड, मेडल र प्रमाणपत्र प्रदान गरेका हुन् ।
प्रतिक्रिया दिनुहोस !
