अवैध रुपमा भारततर्फ गाई लैजाने तीनजना पक्राउ
राजविराज : खुला सीमा नाकाको फाइदा उठाउँदै अवैध रुपमा भारततर्फ गाई लैजाँदै गरेको अवस्थामा तीनजनालाई प्रहरीले पक्राउ गरेको छ । शनिबार प्रहरीले पाँचवटा गाई र चारवटा गोरु पनि नियन्त्रणमा लिएको छ । सप्तरीको तिलाठी कोईलाडी गाउँपालिका–१ बाट प्रहरीले गएराति पक्राउ गरेको जनाएको छ ।
नेपालबाट भारततर्फ ओसारपसार गर्न प्रतिबन्ध गरिएका गाई र गोरु भारत लैजाँदै गर्दा सप्तरीको छिन्नमस्ता गाउँपालिका–४ का ४२ वर्षीय उमेश राम, ३० वर्षीय सुनिल पण्डित र ४२ वर्षीय बिशु पण्डितलाई पक्राउ गरेको हो ।
जिल्ला प्रहरी कार्यालय, सप्तरीका एसपी राजेन्द्र विष्टका अनुसार उनीहरुलाई प्रहरी चौकी तिलाठीले नियन्त्रणमा लिएर आवश्यक अनुसन्धान गरिरहेको बताएको छ ।
एक साताअघि जिल्लाको बलान बिहुल गाउँपालिका–४ स्थित बलान खोला नजिकबाट ४९ वटा गाई, १२ वटा गोरु, तीन बाछी र एक बाछा प्रहरीले नियन्त्रणमा लिएको थियो ।
लगत्तै तिलाठी कोइलाडी–३ बाट दुई गोरु, गत माघ ६ गते राजगढ गाउँपालिका–१ झुटकीबाट दुई गाई, पुस २५ गते चार गोरु, कात्तिक ४ गते पाँच गाई र एक गोरु, भदौ १ गते विष्णुपुर गाउँपालिका–५ बाट १७ गाई नियन्त्रणमा लिएको थियो ।
सप्तरीको विभिन्न नाका भएर सीमावर्ती भारतीय बजारतर्फ अवैध रुपमा दैनिक राष्ट्रिय जनावर गाईको तस्करी हुँदैआएको छ ।
सशस्त्र प्रहरीले गत असोज २० गते राजगढ गाउँपालिका–१ झुटकीबाट ६२ गाई र आठ गोरु नियन्त्रणमा लिएको थियो । त्यसबाहेक फाटफुट रुपमा गाईगोरु बरामद हुने गरेका छन् । पछिल्लो एक वर्षमा सशस्त्र प्रहरीले ९६ गाई र ९१ गोरु नियन्त्रणमा लिएको बताइएको छ ।