ईआर, प्लानिङ ब्वाइज, बीडीएफसीए र सशस्त्र प्रहरी क्वार्टरफाइनलमा
माघ २९, २०७५ मंगलबार २०:४०:०
भक्तपुर : ईआर ब्वाइज, प्लानिङ ब्वाइज, भक्तपुर जिल्ला फुटबल क्लव एसोसिएसन (बीडीएफसीए) र सशस्त्र प्रहरीको ९ नम्बर ब्रिगेड भक्तपुरमा जारी दोस्रो सुटर्स कप फुटबल प्रतियोगिताको क्वार्टरफाइनलमा पुगेका छन् ।
भक्तपुरको माहेश्वरी खेल मैदानमा जारी प्रतियोगिताअन्तर्गत मंगलबार भएको पहिलो खेलमा पद्मज्योति ईआर ब्वाइजले नंखेल युथ क्लवलाई २–० गोलले हराएको हो ।
उक्त खेलमा ईआरको लागि विकेश सुवाल र निरोज थापाले एक÷एक गोल गरेका थिए । सुटर्स फुटसलको आयोजनामा भएको प्रतियोगिताअन्तर्गत अर्को खेलमा काठमाडौंको प्लानिङ ब्वाइजले ललितपुरको बुङमतीस्थित लक्की स्टारलाई २–० गोलले नै पन्छायो । सुनिल लामाको दुई गोलको मद्दतमा विजेता प्लानिङ ब्वाइज क्वार्टरफाइनलमा पुग्न सफल भएको हो ।
यस्तै तेस्रो प्रि–क्वार्टरफाइनल खेलमा भक्तपुरको शिव शिखर बीडीएफसीएले काभ्रेको बनेपास्थित बनेपा ब्वाइज क्लवलाई ४–१ गोलले हरायो । विजेता बीडीएफसीएको लागि दिकेश खड्गीले एक, विदेशी खेलाडी मान्साले दुई र रमेश घिसिङले एक गोल गरे ।
बनेपा ब्वाइजको लागि क्रिटिश छुँजूले सान्त्वना एक गोल गरे । प्रतियोगिताअन्तर्गत मंगलबार भएको अन्तिम खेलमा काठमाडौंको बलम्बुस्थित सशस्त्र प्रहरी बलको ९ नम्बर ब्रिगेडले भक्तपुरको भक्तपुर युथ ट्रेनिङ सेन्टरलाई २–१ गोलले पन्छायो । सशस्त्र प्रहरीको लागि मानबहादुर रानामगर र रामचन्द्र डंगोलले एकएक गोल गरेका थिए ।
यस्तै ट्रेनिङ सेन्टरका लागि जिन्लप तामाङले एक गोल फर्काए । सेन्टरले अन्तिम चार मिनेट बाँकी छँदा पाएको पेनाल्टीको सदुपयोग गर्न नसक्दा नतिजा सशस्त्र प्रहरीलाई सुम्पन बाध्य भएको थियो । काठमाडौं उपत्यकासँगै काभ्रेका २४ टीम सहभागी प्रतियोगितामा बुधबार प्रि–क्वार्टरफाइनलका बाँकी चार खेल हुने प्रतियोगिता संयोजक किशोर धुकुछुले जानकारी दिए ।
प्रतियोगिताका विजेताले एक लाख रुपैयाँ नगद पुरस्कार प्राप्त गर्नेछ । उक्त नगद पुरस्कार निक भुजिकिक हाउजिङ प्रालिले प्रायोजन गरेको उनले बताए । उपविजेताले भने ५० हजार रुपैयाँ नगद पुरस्कार पाउने छ । उक्त पुरस्कार हारती माता डेभलपर्स प्रालिले प्रयोजन गरेको सुटर्स फुटसलका अध्यक्ष रमेश सुवालले जानकारी दिए ।
प्रतिक्रिया दिनुहोस !
