काठमाडौं : धनगढी प्रिमियर लिग (डीपीएल) क्रिकेट प्रतियोगितामा काठमाडौँ गोल्डेन्सले लगातार दोस्रो जित निकालेको छ । बुधबार बिहान भएको खेलमा महेन्द्रनगर युनाइटेडलाई ७ रनले पराजित गर्दै दुई खेलमा शतप्रतिशत नतिजासहित काठमाडौँ लिगको दोस्रो स्थानमा चढेको छ।
फाप्ला क्रिकेट मैदानमा टस हारेर पहिले ब्याटिङमा गएको काठमाडौँले १३३ रन बनाएको थियो । काठमाडौँले दिएक १३५ रनको चुनौती पछ्याउने क्रममा महेन्द्रनगर पुरै २० ओभर खेल्दै ८ विकेटको क्षतिमा १२७ रनमै समेटिएको हो ।
पहिलो खेल गुमाइसकेको महेन्द्रनगरका लागि काठमाडौँविरुद्धको खेल पनि बिर्सन लायक रह्यो । महेन्द्रनगरका लागि अमरसिंह राउटेलाले नटआउट २८ रन जोडे ।
यसैगरी कप्तान शरद भेषावकरले २३ रन जोड्दा आरिफ शेखले १८ रन बनाए । महेन्द्रनगरका लागि सुब्रमुन्यम आनन्दले १५ रन र रोहितकुमार पौडेलले १० रनमात्रै बनाउन सफल भए ।
महेन्द्रनगरलाई हराउने क्रममा काठमाडौँका राशिद खान बलिङतर्फ उत्कृष्ट प्रर्दशन गरे । खानले ४ ओभर बलिङ गर्दै १७ रन दिएर ३ विकेट झारे । यसैगरी अङ्कित डबासले २ विकेट लिँदा नन्दन यादव, ललितनारायण राजवंशी र योगेन्द्रसिंह कार्कीले समान १-१ विकेट झार्न सफल भए ।
यसअघि पहिले ब्याटिङको निम्तो पाएको काठमाडौँका लागि अङ्कित डबासले सर्वाधिक ६५ रनको गतिलो स्कोर गरे । त्यसैगी योगेन्द्रसिंह कार्कीले २२ रन, कप्तान ज्ञानेन्द्र मल्लले १४ रन र मेहबुब आलमले १३ रनको योगदान दिए ।
महेन्द्रनगरका लागि अमरसिंह राउटेलाले २ विकेट झारे । मोहमद नाभेद, अभिनास बोहरा र सागर ढकालले समान १-१ विकेट झारेका थिए ।
योसँगै काठमाडौँ गोल्डेन्स लगातार दुई खेलमा जितसहित डीपीएलको दोस्रो स्थानमा पुगेको छ । दुई खेलबाट ४ अंक बनाएको काठमाडौँ रन रेटका आधारमा समान ४ अंक जोडेको रुपन्देही भन्दा पछि परेको छ।
प्रतिक्रिया दिनुहोस !
