रेडियोकर्मीको कार्यक्रममा मन्त्री-मुख्यमन्त्रीले बजाए दमाह
फागुन १, २०७५ बुधबार १४:६:०
सुर्खेतः सामान्यत: औपचारिक कार्यक्रमको उद्घाटन कसरी गरिन्छ रु रिवन काटेर, विरुवामा पानी हालेर वा पानसमा बत्ती बालेर । तर बुधबार वीरेन्द्रनगरमा आयोजित एक कार्यक्रममा संघीय सरकारका सञ्चारमन्त्री र कर्णालीका मुख्यमन्त्रीले फरक र अनौठो तरिकाले कार्यक्रमको उद्घाटन गरे ।
कार्यक्रमको उद्घाटन गर्दा मन्त्री र मुख्यमन्त्रीले मञ्चमा राखिएका दमाह बजाए । र वीरेन्द्रनगरमा सुरु भएको सामुदायिक रेडियोहरुको सम्मेलनको औपचारिक उद्घाटन गरे । आधुनिक संचारका साधनहरु आविस्कार हुनुपूर्व दमाहामार्फत सूचना आदान–प्रदान गरिन्थ्यो । त्यसैको सांकेतिक स्वरुप मन्त्री र मुख्यमन्त्रीले कार्यक्रमको उद्घाटन पनि दमाह बजाएर गरेका हुन् ।
बुधबारदेखि सुरु भएको अकोरावको सम्मेलनमा देशभरका सामुदायिक रेडियोका प्रतिनिधिहरु सहभागि रहेका छन् । संघीय सरकारका संचारमन्त्री गोकुल बास्कोटाले विश्वसनिय सूचनामा ध्यान दिन सबै रेडियोहरुलाई आग्रह गरे । समाचार प्रशारण गर्ने नाउमा अरुको चरित्र हत्या हुनेगरी अविश्वसनिय सूचना प्रवाहसमेत भइरहेको भन्दै आफ्नो विश्वसनियता कायम राख्न अनुरोध गरेका हुन् ।
‘सूचना दिने नाममा जबरजस्ती अरुको चरित्रहत्या गर्ने काम भइरहेको छ’ उनले भने, ‘मार हान्नु (सूचना प्रवाह) गर्नुभन्दा पहिले दशपटक सोच्नुहोस्, बरु ढिलो जाँदा केही फरक पर्दैन । तर अविश्वसनिय सूचना जाँदा समाजमा भ्रम पैदा हुन्छ ।’
तीन दिनसम्म चल्ने सम्मेलनले सामुदायिक रेडियोमा देखिएका चुनौतीका विषयमा छलफल गरी आगामी बाटो तय गरिने बताइएको छ । यस्तै कर्णाली प्रदेशका मुख्यमन्त्री महेन्द्रबहादुर शाहीले कर्णाली प्रदेश सरकार एक्लैले पछि परेका सूचकांकको ग्राफ बढाउन नसकेको बताए ।
‘अहिले अथाह सम्पत्ति, स्रोतसाधन छ भनेर भाषणमा भनेर मात्रै भनेका छौं, हामी कहाँ के कति छ भनेर तथ्यांक संकलन गर्ने छौं । आउँदो जेठसम्म कर्णालीको गन्तव्य कहाँ हो, कार्यान्वयन शैली कस्तो हुने परम्परागत शैली वा नयाँ शैली अपनाउनु पर्ने हो सार्वजनिक गर्नेछौं’ उनले भने ।
प्रतिक्रिया दिनुहोस !
