लन्डन : च्याम्पियन्स लिग फुटबलको बिहीबार बिहान भएको प्रिक्वार्टरफाइनलको पहिलो लेग खेलमा स्पेनिस क्लब रियल म्याड्रिड र इङ्लिस क्लब टोट्टनहामले जित हात पारेका छन् । रियल म्याड्रिडले डच क्लब आयाक्सलाई उसैको मैदानमा २—१ गोलले हरायो ।
टोट्टनहामले भने घरेलु मैदानको फाइदा उठाउँदै जर्मन प्रतिद्वन्द्वी बोरुसिया डर्टमन्डमाथि ३—० गोलको सजिलो जित हात पार्यो । रियल म्याड्रिड र आयाक्सबीचको प्रतिस्पर्धात्मक खेलमा तीनवटै गोल दोस्रो हाफमा भएका थिए ।
निर्धारित समयको ६०औं मिनेटमा अनुभवी खेलाडी करिम बेन्जेमाले रियल म्याड्रिडका लागि पहिलो गोल गरेका थिए । ७५औं मिनेटमा घरेलु टोलीका आयाक्सका हकिम जियचले गोल गर्दै खेललाई १—१ को बराबरीमा पुर्याएका थिए ।
निर्धारित समयको खेल सकिनुभन्दा तीन मिनेटअघि मार्को एसेन्सियोले निर्णायक गोल गर्दै रियल म्याड्रिडलाई महत्वपूर्ण जित दिलाए । रियल म्याड्रिडको जितमा भिडियो असिस्टेन्ट रेफ्री (भीएआर) प्रविधिको पनि महत्वपूर्ण हात रह्यो ।
रियल म्याड्रिडविरुद्घ सुरुदेखि नै उत्कृष्ट प्रदर्शन गरेको आयाक्सका निकोलस ताग्लियाफिकोले गरेको एउटा गोललाई भीएआर प्रविधिले मान्यता नदिएपछि रियल म्याड्रिडको भाग्य चम्किएको थियो । च्याम्पियन्स लिगमा पहिलो पटक कुनै पनि गोललाई भीएआर प्रविधिले मान्यता नदिएको हो ।
गोल गर्नुअघि निकोलस अफ साइड पोजिसनमा रहेकोले कारण देखाउँदै उनको गोललाई मान्यता नदिइएको हो । पछिल्लो १३ वर्षमा डच क्लब आयाक्सले च्याम्पियन्स लिगको नकआउट चरणमा खेलेको यो पहिलो खेल हो । प्रिक्वार्टरफाइनलको दोस्रो लेग खेल अब आगामी मार्च ५ तारिखमा रियल म्याड्रिडको घरेलु मैदानमा खेलिने छ । हालसम्म सर्वाधिक १३ पटक च्याम्पियन्स लिगको उपाधि जितिसकेको रियल म्याड्रिड प्रतियोगिताको साविक विजेता पनि हो ।
युरोपियन प्रतियोगितामा रियल म्याड्रिडसँग खेलेका पछिल्ला सातवटा खेलमा आयाक्स पराजित हुँदै आएको छ । रियल म्याड्रिडविरुद्धको पछिल्ला सात खेलमा आयाक्सले केवल तीन गोल गरेको छ भने २२ गोल खाएको छ । रियल म्याड्रिडले भने विपक्षीको मैदानमा खेलिएका च्याम्पियन्स लिगको नकआउट चरणको पछिल्ला सातमध्ये ६ खेलमा जित हात पारेको छ । एक खेलमा भने रियल म्याड्रिड पराजित भएको छ ।
यसैगरी आयाक्सले च्याम्पियन्स लिगको नकआउट चरणमा घरेलु मैदानमा खेलिएका पछिल्ला ६ मध्ये एउटा खेलमा पनि जित हात पार्न सकेको छैन । यस अवधिमा आयाक्स तीन खेलमा पराजित भएको छ भने तीन खेल बराबरीमा सकिएको छ ।आयाक्सले पछिल्लो पटक सन् १९९६ को मार्चमा च्याम्पियन्स लिगको नकआउट चरणमा घरेलु मैदानमा खेलिएको खेलमा जर्मन क्लब बोरुसिया डर्टमन्डलाई हराएको थियो ।
रियल म्याड्रिडका करिम बेन्जेमाले च्याम्पियन्स लिगको आयाक्सविरुद्धको पछिल्ला ६ खेलमा गोलका लागि कुनै न कुनै योगदान गरेका छन् । यसबीचमा उनले टोलीका लागि चार गोल आफैले गरेका छन् भने चार गोलका लागि पास उपलब्ध गराएका छन् ।
यसैगरी बोरुसिया डर्टमन्डविरुद्धको खेलमा टोट्टनहामले तीनवटै गोल दोस्रो हाफमा गरेको थियो । ४७औं मिनेटमा ह्युङ मिन सनले टोट्टनहामलाई सुरुआती अग्रता दिलाएका थिए । त्यसपछि खेलको अन्त्यतिर चार मिनेटको बीचमा टोट्टनहामले थप दुई गोल गरेको थियो ।
खेलको ८३औं मिनेटमा जन भर्टोङ्घनले टोलीको अग्रता दोब्बर बनाएका थिए । ८६औं मिनेटमा फर्नान्डो लोरेन्टले अर्को गोल थप्दै घरेलु मैदानमा टोट्टनहामलाई सजिलो जित दिलाएका थिए । उनले परिवर्तित खेलाडीको रुपमा मैदानभित्र प्रवेश गरेको तेस्रो मिनेटमै गोल गरेका हुन् ।
प्रिक्वार्टरफाइनलको दोस्रो लेग खेल मार्च ५ तारिखमा बोरुसिया डर्टमन्डको घरेलु मैदानमा खेलिने छ ।
टोट्टनहामले च्याम्पियन्स लिगमा आफ्नो प्रतिद्वन्द्वीलाई तीन गोलको अन्तरले पराजित गरेको यो पाँचौं पटक हो । बोरुसिया डर्टमन्ड पनि च्याम्पियन्स लिगमा तीन गोलको अन्तरले पराजित भएको यो पाँचौं पटक नै हो । बोरुसिया डर्टमन्डलाई च्याम्पियन्स लिगमा हालसम्म कुनै पनि टोलीले तीन गोलभन्दा ठूलो अन्तरले हराएको छैन ।
यसैगरी टोट्टनहाम सन् २०१०/११ सिजनपछि च्याम्पियन्स लिगको नकआउट चरणमा कुनै पनि जर्मन क्लबलाई हराउने पहिलो इङ्लिस टोली पनि बनेको छ । सन् २०१०/११ सिजनको च्याम्पियन्स लिगको सेमिफाइनलमा म्यानचेस्टर युनाइटेडले जर्मन क्लब साल्केलाई हराएको थियो ।
प्रतिक्रिया दिनुहोस !
