बाबुरामले भने : म दौडिएको छु, अरु पार्टी पनि छिटो आउनुस्

बेसीसहर : नयाँ शक्ति पार्टीका संयोजक एवम् पूर्व प्रधानमन्त्री डा. बाबुराम भट्टराईले देशको समृद्धि र विकासका लागि आफू छिटो छिटो दौडिन चाहेको बताएका छन् । 

पार्टीको मध्यपहाडी लोकमार्ग जनसंवाद कार्यक्रम अन्र्तगत विहीबार लमजुङको सुन्दरबजारमा सम्बोधन गर्दै भट्टराईरले आफू अगाडि दौडिसकेकाले अरु पार्टीलाई पनि छिटो अगाडि आउन आग्रह गरे । 

‘कसैलाई बाबुराम भाग्यो भन्ने लागेको होला, म भागेको होइन, अलि छिटो छिटो दौडिएको हो’, भट्टराईले भने, ‘म अघि बढिसकेँ, अरुलाई पनि अगाडी आउन आग्रह गर्छु ।’

उनले आग्रह पूर्वाग्रह नराखी सबै मिलेर अघि बढ्नुपर्ने बताए । ‘हामी हिजोको मूल्यमान्यतासँग टाँसिनु हुँदैन । जब संसार गतिशील छ भने हामी विचार, राजनीति र पार्टीलाई एउटा धर्मजस्तो बनाउनु हुँदैन’, भट्टराईले भने, ‘पार्टी भनेको विचार हो । विचार भनेको समय र एजेण्डाअनुसार निर्देशित, गतिशिल र परिवर्तनशिल हुन्छ ।’ 

विकासका सम्भावना र यसका समस्याहरु खोज्न आफ्नो पार्टीले मध्यपहाडी लोकमार्ग जनसंवाद अभियान सञ्चालन गरेको उनले बताए । आफू अर्थमन्त्री भएकै बेला मध्यपहाडी लोकमार्ग निर्माण थालिएकाले लोकमार्ग निर्माणको कामको अध्ययन गर्न यो अभियान उपयोगी भएको भट्टराईले बताए । 

उनले मध्यपहाडी लोकमार्गको काममा अवरोध गर्न स्थानीयलाई आग्रह पनि गरे । ‘बरु चार लेनको ठाउँमा २ लेन बनाउनुस् तर, अवरोध नर्गनुस्’, भट्टराईले भने, ‘लोकमार्ग रोकिँदा समृद्धि नै रोकिन्छ । विकासमा पछि परिन्छ ।’ उनले स्थानीय सरकारलाई सडक र शिक्षा पहिलो प्राथमिकता दिएर काम गर्न आग्रह गरे । 

नयाँ शक्तिले बैतडीको पाँचथरको चिवाभञ्ज्याङदेखि झुलाघाटसम्मको १ हजार ७ सय ७६ किमिको मध्यपहाडी लोकमार्गमा जनसंवाद यात्रा सुरु गरेको हो । माघ १५ गते पूर्वको चिवा भञ्ज्याङबाट सुरु भएको जनसंवाद यात्रा फागुन १५ गते पश्चिम बैतडीको झुलाघाटमा पुगेर समापन हुनेछ ।

विहीबार लमजुङको सुन्दरबजार, तनहुँको मानेचौका, लमजुङको दुईपिप्ले, भोर्लेटार र कास्कीको तालबेसीमा कोणसभा, भेटघाट, अन्तरक्रिया लगायत कार्यक्रम गरिने नयाँशक्तिले जनाएको छ । 

अभियानको लमजुङ कास्की यात्रामा भट्टराई पत्नी हिसिला यमी, गण्डकी प्रदेश संयोजक देवेन्द्र पराजुलीसहित प्रदेश सांसद, नेता तथा कार्यकर्ताहरुको सहभागिता छ ।