जनकपुरधाम : अपहरणमा परेको नाकट गरेर आफ्नै आमासँग फिरौती माग्ने २२ वर्षीय युवक साथीसहित प्रहरी फन्दामा परेका छन् ।
जनकपुरधाम उपमहानगरपालिका–१७ बेलौनीका अजयकुमार साह उनका साथी वडा नम्बर–२३ का समसाद नदाफ र रौतहट गढीमाई नगरपालिका–८ का अरविन्द यादवसहित पक्राउ परेका हुन् ।
जिल्ला प्रहरी कार्यालय धनुषाका एसपी शेखर खनालका अनुसार अजयले आफ्ना साथीबाट अपहरणमा परेको नाटक गर्दै आमासँगै फिरौती माग्न अह्राएका थिए । अजयका साथी अरविन्दले उनलाई अपहरण गरेको भन्दै आमा रेखा कुमारीलाई फोन गरेर फिरौती मागेका थिए । एक सातअघि छोरो अपहरणमा परेको भन्दै रेखाले भने प्रहरीमा उजुरी दर्ता गराएकी थिइन् ।
प्रहरीले उनको खोजी गरिरहँदा पनि यसबीचमा अरविन्दले रेखालाई बारम्बार फोन गरेर १५ लाख फिरौती नदिए ज्यान मार्ने धम्की दिएका थिए । अन्त्यमा ५ लाख फिरौती दिने फोनबाटै सहमति भएपछि रेखासँग फिरौती लिन समसाद नदाफ जनकपुर आएका बेला उनलाई प्रहरीले पक्राउ गरेको हो ।
उनको वयानको आधारमा अपहरणमा संलग्न समसादका साथी अरविन्दलाई महोत्तरीको बर्दिबासबाट प्रहरीले पक्राउ गरेको थियो । अजयलाई भने जनकपुरस्थित जनकचाेकबाट पक्राउ गरेको प्रहरीले जनाएको छ ।
तीनजनालाई एकै ठाउँमा राखेर प्रहरीले सोधपुछ गर्दा रेखाका छोरा अजय नै अपहरणको नाटक रच्ने योजनाकार रहेको प्रहरीले जनाएको छ । अजय, अरविन्द र समसाद तीनैजना साथी भएको पनि खुलेको छ । मोटरसाइकल किनेर भारतको गोवा घुम्न जाने र भव्य पार्टी गर्ने उनीहरुले योजना बनाएर यस्तो प्रपन्च रचेको बुझिएको छ ।अपहरणको नाटक गरेर दुःख दिएको आरोपमा उनीहरुमाथि प्रहरीले सार्वजनिक अपराधको मुद्दा चलाएको छ।
प्रतिक्रिया दिनुहोस !
