काठमाडौँ : नेकपा मालेका महासचिव सिपी मैनालीले वर्तमान सरकारको एक वर्षे कार्यकाललाई आफूले शून्य अंक दिने बताएका छन् ।
शुक्रबार रिर्पोटर्स क्लबमा बोल्दै उनले भने, ‘यो सरकार दुईतिहाइको हो, तर यो परम्रागत ढंगमै चल्यो । यसले कम्युनिष्ट चरित्रअनुसार काम गर्नै सकेन । त्यसैले शून्य अंक पाउनुपर्ने हो ।’
महासचिव मैनालीले सरकारले राम्रो योजनाअनुसार काम गर्न नसकेको पनि आरोप लगाए । ‘यो सरकार पनि विगतकैजस्तो निरन्तरता भयो । अहिले यो यथास्थितिमा छ’, उनले भने, ‘उत्पादनमा ह्रास भएको छ । भ्रष्टाचारहरु छरिएका छन् । अहिले भ्रष्टाचारको इपिकसेन्टर स्थानीय निकायमा सरेको छ ।’
मुलुकमा सुशासन पनि नभएको उनले आरोप लगाए । उनले भने, ‘सरकार अहंकारी र दम्भी बनेको छ । सञ्चार जगतमा नियन्त्रण जमाउने र मुख थुन्ने काम भएको छ ।’ मैनालीले सरकारले अहिलेसम्म निर्मला पन्तको हत्यारा पत्ता लगाउन नसकेको भन्दै कडा आलोचना गरे ।
सरकारले विकासको नााममा वातावरणीय पर्यावरणको विनाश गर्ने काम गरेको पनि उनको टिप्पणी थियो। उनले भने, ‘विकासमा विनाश हुन्छ, तर कम क्षतिमा हुनुपर्दछ । अहिले त्यस्तो भएको छैन् । विकासको नाममा प्राकृतिक स्रोत र साधनको दोहन भइरहेको छ ।’
मैनालीले मदन भण्डारी राजमार्ग र निजगढ अन्तर्राष्ट्रिय विमानस्थल बन्नुपर्ने पक्षमा आफू रहेको बताए । यद्यपि यसको निर्माणसँगै ‘बायोलोजिकल डाईभर्सिटी’लाई पनि ध्यान दिनुपर्नेमा उनले जोड दिए ।
सरकार दलाल पुँजीपतीहरुको पक्षमा रहेको पनि उनले आरोप लगाए । ‘भन्नलाई यसले समाजवादउन्मुख भने पनि यसले व्यवहारमा त्यो चरित्र छोडिसक्यो’, मैनालीले भने, ‘राष्ट्रिय चिकित्सा शिक्षा विद्येयक ल्याउँदापनि सरकारले प्राईभेटहरुलाई प्रोत्साह गर्ने गरि ल्याएको छ ।’
प्रतिक्रिया दिनुहोस !
