काठमाडौँ : सत्तारुढ दल नेपाल कम्युनिष्ट पार्टी (नेकपा) का नेता तथा पूर्वमन्त्री आनन्द प्रसाद पोखरेलले केपी ओली नेतृत्वको सरकारको एक वर्षे कार्यकाल अभूतपूर्व सफल भएको दाबी गरेका छन् ।
यो सरकारको आफूले मूल्याङ्कन गर्दा ‘डिस्टिङ्कसन’ दिने बताए । ‘सरकार अलोकप्रिय भएको भए अरु दलको समर्थन यतिबेलासम्म फिर्ता भइसक्थ्यो’, उनले भने, ‘अहिलेसम्म समर्थन जारी छ । त्यसैले सरकार अहिले पनि सही ट्रयाकमा छ ।’
पोखरेलले वर्तमान सरकार घोषित उद्धेश्यअनुसार नै अघि बढिरहेको पनि बताए । ‘कांग्रेसले बजेट ल्याउँदा समर्थन गरेकै हो । बजेट सर्वसम्मत पारित भएको हो’, उनले भने, ‘सरकार प्रमुख प्रतिपक्षी दललाईसमेत विश्वासमा लिएर अघि बढिरहेको छ ।’
सुन तस्करीदेखि अन्य तस्करलाई समेत सरकारले नियन्त्रणमा लिएर कानुनी कारबाही गरेको उनले बताए । उनले भने,‘कतिपयलाई त जेल हालेको छ । तस्करी नियन्त्रण गर्न सरकारले काम गरेको छ ।’
उनले अरुले आरोप लगाएजस्तो मुल्यवृद्धि धेरै नरहेको पनि टिप्पणी गरे । उनले भने, ‘मुल्यवृद्धि पनि ट्रयाकमा छ ।’ यही सरकारले योगदानमा आधारित पेन्सनको कार्यक्रम ल्याएको पनि उनले सुनाए । उनले भने, ‘प्रधानमन्त्री रोजगारका कार्यक्रम पनि अघि बढाएको छ ।’ मजदुरहरुको ज्याला पनि ३९ प्रतिशत वृद्धि गरेको उनले सुनाए ।
त्यस्तै पोखरेलले सरकारले कृषि पेन्सन कार्यक्रम पनि छिट्टै लागू गर्ने सुनाए । उनले भने, ‘हिजोमात्रै जलविद्युतमा जनताको लगानी कार्यक्रम सुरु भएको छ । सरकारले धेरै राम्रो काम गरेको छ ।’ नेपालले छिमेकीहरुसँग पनि सम्बन्ध सुमधुर बनाएको दाबी पोखरेलले गरे । ‘हामी ल्याण्ड लक्डबाट ल्याण्ड-लिङक्डतर्फ अघि बढेका छौँ', पोखरेलले भने ।
यद्यपि पोखरेलले जनताका सबै चाहना पूरा नभए पनि सरकार सही ट्रयाकमा गइरहेको बताए । ‘हो, जनताका अपेक्षा अहिले पनि पुरा भएका छैनन् । तर, सरकार सही ट्रयाकमा छ’, उनले भने ।
प्रतिक्रिया दिनुहोस !
