राप्रपाले भन्यो : बहुदलयताका सबै ठुलाबडाको सम्पत्ति छानबिन गरौँ

काठमाडौं : राष्ट्रिय प्रजातन्त्र पार्टी (राप्रपा) ले २०४६ सालको राजनीतिक परिवर्तनपछि राज्यको उच्च पदमा पुगेका सबै व्यक्तिको सम्पत्ति छानबिन गर्न माग गरेको छ । प्रधानमन्त्री केपी शर्मा ओलीलाई मंगलबार बिहान २२ बुँदै मागपत्र बुझाउँदै उच्च पदमा पुगेर अकुत सम्पत्ति जोड्ने सबैमाथि छानबिन हुनुपर्ने माग गरेको हो । 

प्रधानमन्त्री ओलीलाई बुझाएको मागपत्रमा भ्रष्टाचार नियन्त्रण गर्न प्रभावकारी कदम चाल्न आग्रह गर्दै राप्रपाले विदेशमा लुकाएको कालोधन ल्याउने, जफत गर्ने, र शंकास्पद व्यक्तिहरुको बैंक खाता तत्काल रोक्का गरी कारबाही अघि बढाउनेतर्फ सरकारको ध्यानाकर्षण गराएको हो । 

राप्राले बुझाएको मागपत्रको बुँदा नम्बर ७ को (छ) मा २०४७ साल अर्थात् बहुदलयताका सबै उच्च पदस्थको सम्पत्ति छानबिन गर्न भनिएको छ । '२०४७ साल यताका उच्च पदस्थ व्यक्तिहरुको सम्पतिको छानविन गर्न न्यायिक छानवि आयोग गठन गरियोस', राप्रपाले बुझाएको मागपत्रमा भनिएको छ, 'राज्यकोषबाट सञ्चालित सबै निकाय र मन्त्रिपरिषद्‍बाट नीतिगत निर्णयको आवरणमा हुने भ्रष्टाचारसमेत अख्तियार दुरुपयोग अनुसन्धान आयोगको कार्यक्षेत्रमा समावेश गरियोस ।'

राप्रपाले प्रधानमन्त्रीलाई बुझाएको मागपत्रमा सर्वोच्च अदालतको आदेश अनुसार एनसेलले तिर्नुपर्ने पुँजीगत लाभकर तत्काल उठाउन पनि माग गरेको छ । त्यसैगरी कर छलीमा मुछिएका सबैलाई कानुन बमोजिम कारबाही गर्न पनि राप्रपाले माग गरेको छ । 

राप्रपाले नेपाल वायुसेवा निगमले वाइडबडी जहाज खरिद गर्दा भएको भ्रष्टाचारको छानबिन गर्न पनि माग गरेको छ । त्यसैगरी मेलम्ची खानेपानी आयोजनामा भएको घोटालाको पनि छानिब हुनुपर्ने राप्रपाको मागपत्रमा उल्लेख छ । राप्रपाले बिनाप्रतिस्पर्धा बूढीगण्डकी जलविद्युत् आयोजना चिनियाँ कम्पनीलाई दिइएकोमा आपत्ति जनाउँदै नेपालले नै बनाउनुपर्ने माग गरेको छ ।  

राजसंस्थासहितको गोलमेच 

राप्रपाले राजसंस्थाको मुद्दामा पुरानै अडान दोहोर्‍याएको छ । उसले राजसंस्थालाई पनि सहभागी गराएर गोलमेच सम्मेलनको माग गरेको छ। 'राजसंस्थासहितका सबै राजनीतिक शक्तिहरु अटाउने नेपाली संस्करणको मौलिक प्रजातन्त्र कायम गर्न अविलम्व सर्वपक्षीय गोलमेच सम्मेलन गरियोस्', राप्रपाले भनेको छ। 

राप्रपाले संगठितरुपमा जवरस्ती धर्म परिवर्तन गराउने काम नियन्त्रण गर्न माग गर्दै धर्म परिवर्तनमा संलग्न गैरसरकारी संस्थामाथि प्रतिबन्ध लगाउन पनि सरकारसँग माग गरेको छ । 

प्रधानमन्त्रीलाई बुझाइएको मागपत्रमा संविधानमा उल्लेखित 'धर्मनिरपेक्षता' खारेज गरेर पूर्ण धार्मिक स्वतन्त्रतासहित नेपाललाई हिन्दुराष्ट्र घोषणा गर्न पनि माग गरिएको छ । 

मागपत्रको पूर्णपाठ

(१) संविधानमा रहेको 'धर्मनिरपेक्षता' खारेज गरियोस् तथा पूर्ण धार्मिक स्वतन्त्रता सहित नेपाललाई हिन्दुराष्ट्र घोषणा गरियोस् ।

(२) राजसंस्था सहित सबै राजनीतिक शक्तिहरु अटाउने नेपाली संस्करणको मौलिक प्रजातन्त्र कायम गर्न अविलम्व सर्वपक्षीय गोलमेच सम्मेलन गरियोस् ।

(३) संघीयता बारे जनताको प्रत्यक्ष अभिमत बुझ्न राष्ट्रिय जनमत संग्रह गरियोस् ।

(४) देश टुक्र्याउन चाहने विखण्डनकारी तत्वलाई कडाईका साथ नियन्त्रण गरि राष्ट्रिय अखण्डता सुदृढ तुल्याईयोस् ।

(५) संगठित रुपमा लोभ लालच देखाएर र भ्रम सिर्जना गरेर जवर्जस्ती धर्म परिवर्तन गराउने कार्य नियन्त्रण गरियोस् तथा धर्म परिवर्तनमा संलग्न गैर सरकारी संस्थाहरुलाई बन्द गरियोस् ।

(६) बेरोजगारी समस्या समाधानको निमित्त अल्पकालिन तथा दीर्घकालिन कार्ययोजना कार्यान्वयन गरियोस् । यस क्रममाः
(क) वर्षमा कम्तिमा पाँच लाख रोजगारी सिर्जना गर्ने गरि दीर्घकालिन आर्थिक विकास योजना संचालन गरियोस् ।
(ख) कम्तिमा एक परिवार एक रोजगारी कार्यक्रम कार्यान्वन गरियोस् ।
(ग) रोजगारीको अवसर नपाएकाहरुलाई निश्चित अवधिसम्म वेरोजगार भत्ता उपलव्ध गरियोस् ।

(७) भ्रष्टाचार नियन्त्रण गर्न प्रभावकारी कदम चालियोस् । यस क्रममाः
(क) विदेशमा लुकाएर राखिएका कालोधन देशभित्र ल्याउने, जफत गर्ने, शंकास्पद व्यक्तिहरुको बैंक खाता तत्काल रोक्का गर्ने तथा यस्ता अवैध कारोवार संलग्न व्यक्तिहरुलाई कानुन बमोजिम कार्वाही गर्ने काम तदारुकताका साथ कार्यान्वयन गरियोस् ।
(ख) सर्वोच्च अदालतको आदेश अनुरुप एनसेलले तिर्नुपर्ने पुंजिगत लाभकर लगायत सबै कर असुली गरियोस् तथा करछली प्रकरणमा संलग्न सबैलाई कानुन बमोजिक कार्वाही गरियोस् ।
(ग) ३८ क्विण्टल तथा ३३ किलो सुन तस्करीको छानविन गरि दोषीलाई कार्वाही गरियोस् ।
(घ) विना प्रतिस्पर्धा बुढिगण्डकी जलविद्युत अयोजना निर्माण र सञ्चालनको लागि दिईएको ठेक्का खारेज गरि उक्त आयोजना नेपालले नै निर्माण गरियोस् ।
(ङ) मेलम्ची खानेपानी आयोजनामा भएको घोटालाको छानविन गरि दोषीलाई कार्वाही गरियोस् ।
(च) नेपाल वायुसेवा निगमले खरिद गरेको वाईड बडि जहाज खरिदमा भएको अनियमितता र भ्रष्टाचारको छानविन गरि कानुन बमोजिम कार्वाही गरियोस् ।
(छ) २०४७ साल यताका उच्च पदस्थ व्यक्तिहरुको सम्पतिको छानविन गर्न न्यायिक छानवि आयोग गठन गरियोस् ।
(ज) राज्यकोषबाट सञ्चालित सबै निकाय र मन्त्रिपरिषदबाट नीतिगत निर्णयको आवरणमा हुने भ्रष्टाचार समेत अख्तियार दुरुपयोग अनुसन्धान आयोगको कार्यक्षेत्रमा समावेश गर्ने ।

(८) महंगी तथा कालोबजारी नियन्त्रण गर्न प्रभावकारी संरचना र नीति कायम गरियोस् ।

(९) गौरक्षाको प्रभावकारी कार्ययोजना संचालन गरियोस् । 
यस क्रममाः
    (क) कानुनद्वारा दण्डनीय रहेको गौहत्यालाई नियन्त्रण गरियोस ।
    (ख) प्रत्येक गाउँपालिका तथा नगरपालिकामा कम्तिमा एउटा गौशाला निर्माण गरियोस्,
(१०) हाल आरक्षणको सुविधाबाट वञ्चित रहेका तर आर्थिक रुपमा विपन्न  अन्य जातीय समुहलाई समेत सबै क्षेत्रमा कम्तिमा १० प्रतिशत आरक्षण गरियोस् ।

(११) दश कक्षासम्म संस्कृत शिक्षा अनिवार्य गरियोस् ।

(१२) पौष २७ गते पृथ्वी जयन्ती र राष्ट्रिय एकता दिवस, फागुन ७ गते त्रिभुवन जयन्त िर प्रजातन्त्र दिवस राष्ट्रिय पर्वका रुपमा मनाउने तथा कृष्ण जन्माष्टमी र रामनवमीमा सार्वजनिक विदा दिईयोस ।

(१३) राष्ट्रिय राजस्वबाट तलब खाने कर्मचारी र शिक्षकहरुले पार्टीको सदस्यता लिन नपाउने व्यवस्था गरियोस् ।

(१४) सबै धर्म र सम्प्रदायका मन्दिर, मठ, गुम्वा, मस्जिद र चर्चको सञ्चालन र व्यवस्थापनमा सरकारी नियन्त्रण अन्त गरियोस् । यस क्रममा  पशुपतीनाथ, लुम्बिनी र  जानकी मन्दिरको सञ्चालन र व्यवस्थापनको जिम्मेवारी सम्बन्धित धर्म र सम्प्रदायका समुदायलाई तत्काल हस्तान्तरण गरियोस् ।

(१५) प्रशासन, शैक्षिक संस्था, कुटनितिक नियोग, संवैधानिक अंग जस्ता नियकायहरुलाई राजनीतिक हस्तक्षेप र प्रभावबाट मुक्त राख्ने तथा पार्टीगत आधारमा भागवण्डा, नियुक्ति, सरुवा बढुवा गर्ने कार्य अन्त गरियोस् ।

(१६) छिमेकी मित्रराष्ट्र भारतसँगको सन् १९५० को शान्ति तथा मैत्री सन्धि प्रतिस्थापन गरि नयाँ सन्धी गरियोस् तथा भारतसँगको खुला सिमा व्यवस्थित र नियमन गरियोस् ।

(१७) कालापानी, लिपुलेक र सुस्ता लगायतका क्षेत्रमा अतिक्रमित नेपाली भूमी फिर्ता लिन कुटनीतिक पहल गरियोस् ।

(१८) नागरिकता सम्बन्धि विवाद सधंैका लागि अन्त गर्नः
    (क) प्रत्येक नेपालीले सहज र सरल ढंगबाट नागरिकता प्रमाणपत्र पाउन सक्ने व्यवस्था कायम गरियोस् ।
    (ख) गैर नेपालीले समेत नेपाली नागरिकता प्रमाणपत्र लिएको सन्दर्भमा छानविन गर्न उच्चस्तरीय न्यायिक आयोग गठन गरियोस् तथा गैर नेपालीले लिएको नागरिकता खारेज गरियोस् ।

(१९) महिला विरुद्ध हुने सबै प्रकारका हिंसा र विभेद अन्त गर्न सशक्त कदम चालियोस् ।

(२०) कानुनद्वारा निषेधित सबै प्रकारका जातीय विभेद र छुवाछुत कडाईका साथ कार्यान्वयन गरियोस् तथा जातीय आधारमा मन्दिर प्रवेशमा लगाईएको भेदभावलाई हटाईयोस् ।

(२१) स्थानीय तहमा लगाएका अव्यवहारिक करहरु तथा तीन तहका सरकारबाट लगाईएका दोहरो कर तत्काल खारेज गरियोस् ।

(२२) विदेशमा रहेका नेपाली नागरिकहरुले समेत मतदान गर्न पाउने गरि आवश्यक व्यवस्था आगामी आम निर्वाचनबाट सुरु गरियोस् ।

कमल थापा
अध्यक्ष
राप्रपा