भक्तपुर : भक्तपुरका दुई भिन्न स्थानमा दुईजना मृत अवस्थामा फेला परेका छन् । भक्तपुर नगरपालिका–३ डेगमना १९ वर्षाीया युवती र चाँगुनारायण नगरपालिका–३ झौखेलमा अर्का पुरुष मृत अवस्थामा भेटिएका हुन् ।
महानगरीय प्रहरी परिसर भक्तपुरका अनुसार १९ वर्षीया अञ्जली चौगुठी आफ्नै घरको चार तलामाथि रहेको फलामको हुकमा निलो र रातो रंगको सलको पासो लगाइ झुण्डिएर मृत अवस्थामा फेला परेकी थिइन् ।
परिसरका प्रवक्ता प्रहरी नायब उपरीक्षक रेवतीरमण पोखरेलका अनुसार मंगलबार बिहानै अञ्जली आफ्नै घरमा झुण्डिएर रहेको भन्ने खबर प्राप्त हुनासाथ परिसरबाट खटिएको प्रहरी टोली घटनास्थल पुगेको थियो ।
घटनास्थल पुगेको प्रहरीले प्रारम्भिक अनुसन्धान कार्य गरी शव पोस्टमार्टमको लागि भक्तपुर अस्पताल पठाइएको उनले जानकारी दिए । घटनाबारे थप अनुसन्धान कार्य भइरहेको भक्तपुर परिसरले जनाएको छ ।
मंगलबार नै झौखेलस्थित सडक किनारामा अन्दाजी ५० वर्षीय पुरुष मृत अवस्थामा भेटिएका हुन् । महानगरीय प्रहरी परिसर भक्तपुरका अनुसार ५ फिट ३ इन्च उचाइ, मंगोलियन अनुहार, गहुँगोरो वर्ण, कालो पाइन्ट, रातो टीर्सट, प्लाष्टिकको चप्पल लगाएका व्यक्ति मृत फेला परेका हुन् ।
स्थानीयका अनुसार मागेरै जीवन गुजारा गर्दैआएका ती व्यक्ति ‘राई दाइ’ भनी चिनिन्थे । उनको नाम–थर र वतन नखुलेको भक्तपुर प्रहरी परिसरले जनाएको छ ।
स्थानीयले ती व्यक्ति मृत अवस्थामा रहेको भनी प्रहरीलाई जानकारी दिएका थिए । खबर पाएपछि घटनास्थल पुगेको प्रहरी टोलीले प्रारम्भिक अनुसन्धान गरी शव पोस्टमार्टमको लागि भक्तपुर अस्पतालमा पठाइएको परिसरले जनाएको छ । उक्त घटनाबारे पनि थप अनुसन्धान भइरहेको परिसरले बताएको छ ।
प्रतिक्रिया दिनुहोस !
