डडेलधुरामा प्रधानमन्त्रीकाे ठाेकुवा : महाकालीमा तुइन विस्थापित भइसक्यो

डडेल्धुरा : प्रधानमन्त्री केपी शर्मा ओलीले महाकाली नदीमा रहेका तुइन विस्थापित भइसकेको ठोकुवा गरेका छन् ।

उनले महाकाली नदीमा पुलको आवस्यकता भने औंल्याएका थिए । साथै आफ्नै पहलबाट तुइन विस्थापित भएको प्रधानमन्त्रीको दावी थियो । ‘टायर, ट्युब चढेर महाकाली जस्तो नदी तरेको मैलै आखाँले हैन, तस्बिरमा देखेको थिएँ’ प्रधानमन्त्रीले भने, ‘तुइनको जोखीमपूर्ण यात्रा हटाउन मैले गत वर्ष बोलेको कुरा पूरा भइसकेको छ ।’
चमेलिया जलविद्युत् आयोजना अन्तरगत सव स्टेशनको उद्घाटन गर्न डडेलधुरा आएका प्रधानमन्त्रीले यस्तो बताएका हुन् । डडेल्धुराको स्याउलेमा निर्मित १३२/३३/११ केभी सव स्टेशनको उद्घाटन गर्दै प्रधानमन्त्री ओलीले पश्चिम सेती जलविद्युत् आयोजना आफू प्रधानमन्त्री भइरहँदा सुरु हुने पनि जिकिर गरे ।

उनले भनेका छन्, ‘म प्रधानमन्त्री हुँदाहुँदै पश्चिम सेती बन्छ, म प्रधानमन्त्री हुदाँहुँदै यहाँ धेरै बाटाहरु बन्छन् । गत वर्ष यहाँ सव स्टेसनको ठेक्का पास हुँदैथियो, अहिले मै आएर उद्घाटन गर्दै छु ।’

निर्मला हत्याकाण्डबारे
प्रधानमन्त्री ओलीले कन्चनपुरको निर्मला हत्या काण्डबारे पनि बोलेका थिए । निर्मला हत्याकाण्डमा संलग्नलाई सरकारले कारबाही गरेर छाड्ने उनको आश्वासन थियो ।

अख्तियार दुरुपयोग अनुसन्धान आयोगका सदस्यहरु राजीनामा दिएर भाग्नुपर्ने अवस्था आएको उल्लेख गर्दै उनले केही पनि कारबाहीबाट भाग्न नपाउने बताए । ‘कोही पनि कारवाहीबाट बच्न सक्दैन, छानविन हुन्छ कारवाही हुन्छ,’ उनले भने ।

निर्मला हत्याकाण्डका दोषीलाई लक्षित गर्दै उनले ढिलै भए पनि हत्यारालाई सरकारले कानुनको दायरामा ल्याइछाड्ने आश्वासन दिए । प्रधानमन्त्री ओलीले बुधबार बिहान ९ बजे सुदुरपश्चिम प्रदेशसभाको बैठकलाई सम्बोधन गर्ने कार्यक्रम छ ।