पोखरा : गण्डकी प्रदेश सरकारको बुधबारको बैठकले नवलपुरमा घरेलु तथा साना उद्योग कार्यालय खोल्नेलगायत निर्णय गरेको छ।
सरकारका प्रवक्तासमेत रहेका भौतिक पूर्वाधार विकास मन्त्री रामशरण बस्नेतका अनुसार पोखरा स्वास्थ्य विज्ञान प्रतिष्ठानलाई ५ करोड ९६ लाख रुपैया स्थानान्तरण गर्ने लगायत निर्णय मन्त्रिपरिषदले गरेको छ।
–नवलपुरमा घरेलु तथा साना उद्योग कार्यालय स्थापना गर्ने। आर्थिक भार नपर्ने गरी कर्मचारी व्यवस्था गर्ने। २०७५ असोज ३ गतेको मन्त्रिपरिषद बैठकबाट नवलपुरमा उक्त कार्यालय खोल्न संघ सरकारसँग कर्मचारी मागसहित गरिएको पठाएको अनुरोध सुनुवाइ नभएपछि प्रदेश आफैंले कार्यालय खोल्ने निर्णय भएको हो।
–स्याङ्जाको मालुंगा र तनहुँको आँबुखैरेनीमा विषादी अवशेष द्रूत विश्लेषण प्रयोगशाला खोल्ने। प्रदेशमा भित्रने तरकारी, फलफूल र पशुपन्छी जाँच गरेरमात्रै प्रवेश दिने। मानव स्वास्थ्य प्रतिकूल विषादीको मात्रा भेटिए प्रदेशमा प्रवेश नदिने।
–पोखरा स्वास्थ्य विज्ञान प्रतिष्ठानका नाममा आएको ५ करोड ९६ लाख रुपैयाँ प्रतिष्ठानलाई उपलब्ध गराउन संघ सरकारलाई सहमति दिने। उक्त प्रतिष्ठान अन्तर्गतको पश्चिमाञ्चल क्षेत्रीय अस्पताललाई ८ शीर्षकका लागि उक्त रकम आएको थियो।
प्रतिक्रिया दिनुहोस !
