लन्डन : इङ्लिस प्रिमियर लिग क्लब लिभरपुलका प्रभावशाली स्ट्राइकर साडियो मानेको घरमा चोरी भएको छ । आफ्नो घरमा चोरी हुँदा २६ वर्षीय माने भने च्याम्पियन्स लिग खेल्न मैदानमै थिए । च्याम्पियन्स लिगअन्तर्गत मंगलबार राति भएको खेलका क्रममा उनको घरमा चोरी भएको बताइएको छ ।
च्याम्पियन्स लिगको अन्तिम १६ टोलीबीचको उक्त पहिलो लेग खेल गोलरहित बराबरीमा सकिएको थियो । जर्मन क्लब बायर्न म्युनिखविरुद्घको उक्त खेल लिभरपुलकै घरेलु मैदानमा खेलिएको थियो । चोरले मानेको केही घडी, मोबाइल फोन र कारको चाबीलगायका सामान चोरेर लगेको जनाइएको छ ।
स्थानीय प्रहरीका अनुशार माने एनफिल्डमा खेलिरहँदा दक्षिणी लिभरपुलको एलर्टनस्थित उनको घरमा कोही पनि थिएनन् । प्रहरीले चोरीको अनुशन्धान भइरहेको बताएको छ । ‘चोरीको घटनामा संलग्नको खोजी कार्य भइरहेको छ । चोरीसँग सम्बन्धित कुनै सुचना भए उपलब्ध गराउन सर्वसाधारणसँग पनि अनुरोध गरेकका छौं’, स्थानिय प्रहरी फिल माहोनले भनेका छन् ।
सेनेगलका अन्तर्राष्ट्रिय खेलाडी मानेको घरमा चोरी भएको यो दोस्रो पटक हो । यसअघि सन् २०१७ को नोभेम्बरमा पनि मानेको घरमा चोरी भएको थियो । रमाइलो संयोग के हो भने त्यतिबेला पनि आफ्नो घरमा चोरी हुँदा माने च्याम्पियन्स लिग खेल मैदानमै थिए । त्यतिबेला लिभरपुलले च्याम्पियन्स लिगमा मारिबोर क्लबको सामना गर्दैथियो ।
प्रतिक्रिया दिनुहोस !
