काठमाडौँः नेपाल कम्युनिष्ट पार्टी (नेकपा) का सांसद योगेश भट्टराईले अर्बौँको कारोबार गर्ने सामाजिक सञ्जाललाई नेपालमा दर्ता गरिनु जरुरी रहेको बताएका छन् ।
शुक्रबार बसेको प्रतिनिधि सभा बैठकमा सूचना तथा प्रविधिसम्बन्धी विधेयकमाथि भएको छलफलमा सहभागी हुँदै सांसद भट्टराईले सूचना सञ्चारमाध्यम सेवा मात्रै भएनन् उद्योग पनि भइसकेकाले दर्ता अनिवार्य भएको उल्लेख गरे ।
‘सामाजिक सञ्जालको नियमन जरुरी छ, फेसबुकले मात्रै विज्ञापनका नाममा नेपाल वार्षिक १३ अर्ब भन्दा धेरै कारोबार गरिरहेको छ’, उनले भने, ‘त्यसैले सामाजिक सञ्जालको दर्ता महत्वपूर्ण छ । तर यसो गर्दा मौलिक हक, सञ्चारको हक र सूचनाको हकको संरक्षण जरुरी छ ।’
विधेयकका सूचनाको अदालत, सूचना केन्द्र, सामाजिक सञ्जाल व्यवस्थापन आदि राम्रा कुरा उल्लेखित भएको बताउँदै डाटाको सुरक्षा पनि गम्भीर विषय भएको उल्लेख गरे ।
‘नेपाल सामरिक हिसाबले महत्वपूर्ण स्थानमा छ, त्यसैले पनि डाटाको सुरक्षा जरुरी छ’, उनले भने, ‘अभिव्यक्ति, विचारको र प्रेस स्वतन्त्रतासहितका अकुण्ठित अधिकारहरुलाई विधेयकले सुरक्षित गर्नुपर्छ ।’
सांसद भट्टराईले हरेक मान्छेको फेसबुक, ट्वीटर एकाउन्ट दर्ता गर्ने नभइ फेसबुक र ट्वीटरका सञ्चालक कम्पनी नेपालमा दर्ता गर्ने कुरा विधेयकमा भएकाले यसबाट कसैले भ्रम पाल्न नहुने पनि स्पष्टिकरण दिए ।
प्रतिक्रिया दिनुहोस !
