रुकुम पश्चिम : मुसीकोट नगरपालिका वडा नं. १ गिलबाङबाट प्रहरीले रेडपाण्डाको तीन थान छालासहित एक जनालाई पक्राउ गरेको छ। ग. ५ प. ११६५ नम्बरको मोटरसाइकमा चढेर आएका बाँफिकोट गाउँपालिका वडा नंं ३ कोलचौरका २३ वर्षीय विकास बिकलाई पक्राउ गरेको प्रहरीले जनाएको छ ।
रेडपाण्डाको छाला ओसार–पसार भइरहेको भन्ने गोप्य सूचनाका आधारमा खटिएको प्रहरी टोलीले शुक्रबार दिउँसो तीन बजेतिर छालासहित बिकलाई पक्राउ गरेको डीएसपी सुमित खड्काले जानकारी दिए। मोटरसाइकल पछाडि बस्ने प्रतीक भने प्रहरीलाई आक्रमण गरेर फरार भएको र आक्रमणबाट एकजना प्रहरी घाइते भएको डीएसपी खड्काले बताए ।
फरार व्यक्तिको खोजीकासाथै घटनाबारे थप छानबिन भइरहेको प्रहरीको भनाइ छ। ‘उच्च पहाडी क्षेत्र तथा हिमाली भेगमा पाइने रेडपाण्डाको तस्करी संगठित रुपमा भएको हुनसक्छ,’ डीएसपी खड्काले भने, ‘पक्राउ परेका व्यक्ति र बरामद गरेको छाला जिल्लामा रहेको वन डिभिजनलाई जिम्मा लगाउने उनले बताए ।
प्रतिक्रिया दिनुहोस !
