मदिरा निषेधित नगरमा रक्सी पिए, भिरबाट खसेर ज्यान गुमाए
फागुन १३, २०७५ सोमबार १५:०:०
मुगु : छायानाथ रारा नगरपालिका–३ स्थित साँया खोलास्थित भिरबाट खसेर आइतवार राति एक जनायुवकको मृत्यु भएको छ ।
सदरमुकाम गमगढीबाट मदिरा पिएर घर फर्कँदै गरेका छाँयानाथ रारा नगरपालिका–३ निगाले गाउँका ३० वर्षीय पुर्णबहादुर रोकायाको सायाँ खोलास्थित बाटोदेखि खसेर मृत्यु भएको हो ।
मृतक रोकायासँगै गएका उनका साथी २७ वर्षीय सूर्यबहादुर विककोे जिल्ला अस्पतालमा उपचार भइरहेको जिल्ला प्रहरी कार्यालयले जानकारी दिएको छ ।
जिल्ला अस्पतालमा उपचारका लागि भर्ना गरिएका बिकका अनुसार मृतक रोकाया र आफूहरुले बजारबाट मदिरा पिएर घर जाने क्रममा रोकाया एक्कासी बाटोबाट ६० मिटर तल खोलामा खसेका थिए ।
भिरबाट खसेको सुनेपछि गाउँले र प्रहरी घटनास्थल पुगेर रोकायालाई जिल्ला अस्पताल ल्याउदै गर्दा बाटैमा मृत्यु भएको जिल्ला अस्पतालले जनाएको छ । छाँयानाथ रारा नगरपालिकाले आफ्नो नगर भित्रका सबै वडामा मंसिर १ देखि मदिरा निषेधित क्षेत्र घोषणा गरेको थियो । नगरपालिकालाई मदिरा निषेध गरिए पनि अवैध कारोवार भइरहेको यो घटनाले खुलेको छ ।
प्रतिक्रिया दिनुहोस !
