आहा रारा गोल्डकप : अनिलको ह्याट्रिकमा थ्रीस्टार सेमीफाइनलमा

पोखरा : अनिल गुरुङको ह्याट्रिकले थ्रिस्टार क्लव पोखरामा जारी आहा रारा गोल्डकप फुटबल प्रतियोगितामा सेमिफाइनलमा पुगेको छ । सोमबार भएको खेलमा युनाइटेड सिक्किम फुटबल क्लबलाई ५–२ गोल अन्तरले हराउँदै थ्रिस्टार क्लवसेमिफाइनलमा पुगेको हो। 

थ्रिस्टार क्लवले सिक्किम विरुद्धको खेलमा दुई पेनाल्टी र एक सुसाईड गोल उपहार पाउँदै सहज जित निकालेको हो । 

थ्रिस्टारले पहिलो गोल खेलको २६ औं मिनेटमै प्यानाल्टिबाट गरेको थियो । सिक्किमका संजय क्षेत्रीले थ्रिस्टारका खेलाडी सुशिल राईलाई डिबक्सभित्र लडाएपछि पाएको पेनाल्टिलाई सदुपयोग गर्दै अनिल गुरुङले गोल गरेका थिए । 

थ्रिस्टारले खेलको ५१ मिनेटमा सिक्किमकै खेलाडीबाट गोल उपहार पाएको थियो । सिक्कमका खेलाडी जिग्मी दोर्जे भुटीयाले आफ्नै गोल रक्षकले अनील गुरुङले प्रहार गरेको बल बचाउ गर्दा रिबान्स भएको बललाई क्लियर गर्ने क्रममा आफ्नै गोल पोष्टको जाली चुम्दा स्तब्ध बनेका थिए । 

तेस्रो गोल भने थ्रिस्टारका विदेशी खेलाडी अजयी मार्टीन्सले ७० औ मिनेटमा गरे । मार्टीन्सले मैदानको करिव मध्यभागबाट बललाई अगाडि बढाउँदै विपक्षी सिक्किमका गोल रक्षक विट भएको अवस्थामा गोल गरेका थिए । 

थ्रिस्टारले चौथो गोल पेनाल्टिबाटै खेलको ८१ औं मिनेटमा गरेको थियो । डिबक्स भित्र अनील गुरुङलाई विपक्षी खेलाडीले लडाएपछि पाएको पेनाल्टीको अवसरलाई अनील गुरुङले सदुपयोग गर्दै व्यक्तिगत दोस्रो गोल गरेका थिए । खेलको ८५ औं मिनेटमा अनिल गुरुङले मार्टीन्सको पासमा पाएको बललाई सदुपयोग गर्दै ह्याट्रिक गोल गरेका थिए । 

खेलको सुरुवाती चरणमा राम्रो खेल पस्केको सिक्किमको टोली थ्रिस्टारले पेनाल्टीबाट गोल गरेपछि र आफ्नै खेलाडीले आफ्नै गोल पोष्टमा गोल गरेपछि दवावमा परेको थियो । 

सिक्किमले  सान्त्वना गोल गर्न खेलको ८९ औं मिनेट कुर्नु परेको थियो । सिक्किमका लागि पहिलो गोल सोनम टि भुटियाले गरेका थिए । सिक्किममा ओङ छिरिङ लोप्चाले खेलको ९० प्लस ३ मिनेटमा पेनाल्टीबाट गोल गरेका थिए । थ्रिस्टारका अनन्त तामाङको हेण्ड भएपछि सिक्किमले पेनाल्टी पाएको थियो । खेलमा थ्रिस्टारका अनील गुरुङ म्यान अफ दि म्याच घोषित भए ।