काठमाडौं : अखिल नेपाल फुटबल संघ (एन्फा) का मानार्थ अध्यक्ष टासी घलेले आफुले सँधै नेपाली फुटबलको सुधारका पक्षमा आवाज ठउँदै आएको बताएका छन् । ‘मैले सँधै एन्फाको सुधार र फुटबलको विकासका लागि आवाज उठाउँदै आएको छु ।
कुनै ब्यक्ति विशेषको विरोध वा समर्थन गर्नुमा मेरो कुनै रुची छैन’, सोमबार आयोजित पत्रकार सम्मेलनमा घलेले भने । उनले नेपाली फुटबलमा सुधारको कुरा गर्दा कार्यसमितिले पदबाट हटाउनुलाई आफुले अपमानका रुपमा लिएको धारणा ब्यक्त गरे ।
एन्फ कार्यसमितिको एक महिनाअघि बसेको बैठकले मानार्थ अध्यक्ष घलेले अनुशासनहीन काम गरेको भन्दै उनलाई पदमुक्त गर्ने निर्णय गरको थियो । ‘एन्फाको विधानमा मानार्थ अध्यक्षको व्यवस्था भए पनि कार्यसमितिले हटाउन सक्ने व्यवस्था छैन । म ३० वर्ष फुटबलमा काम गरेको व्यक्ति हुँ । फुटबलमा भएका गल्ती र कमजोरीको कुरा सधैँ उठाउँछु ।
पहिलो कार्यसमितिको बैठकमै विदेशी नागरिक नवीन पाण्डेलाई एन्फाको सल्लाहकारमा नियुक्ति गरिँदा मैले आवाज उठाए । रुस विश्वकपमा नेपाललाई आएको दुई सय ५० वटा टिकटमा पनि अनियमितता भएको विषयमा पनि कुरा उठाएको थिएँ । यही कुराको विरोध गर्दा कारबाही गरिनु कस्तो अचम्म,’ घलेले भने ।
घलेले एन्फाले पदमुक्त गरेपछि अदालतलगायत खेलकुदको माथिल्लो निकायमा उजुरी दिएका थिए । तीन दिनअघि मात्र पाटन उच्च अदालतले निवेदनको अन्तिम टुंगो नलागेसम्म घलेलाई मानार्थ पदबाट हटाउने निर्णय तत्काल कार्यान्वयन नगराउन एन्फाको नाममा अन्तरिम आदेश जारी गरेको थियो । घले अघिल्लो कार्यकालमा पनि एन्फाको मानार्थ अध्यक्ष रहेका थिए । घलेले एक वर्ष अघि भएको एन्फा निर्वाचनमा हालका अध्यक्ष कर्माछिरिङ शेर्पाको समूहलाई नै सहयोग गरेका थिए ।
प्रतिक्रिया दिनुहोस !
