कालिकोट : स्वास्थ्य संस्थाले प्रसूति भत्ता दिन छाडेका छन् । गाउँपालिकाले समयमै रकम भुक्तानी नदिँदा प्रसूति सेवा लिन आएका महिला रित्तो हात फर्किने गरेका हुन् । आमा सुरक्षा कार्यक्रमअन्तर्गत स्वास्थ्य संस्थामा प्रसूति सेवा लिएबापत ३ हजार र नियमित गर्भवती जाँच गराएबापत ८ सय रुपैयाँ प्रोत्साहन भत्ता पाउने गरेका थिए ।
पचालझरना गाउँपालिका–७ को स्वास्थ्य चौकी नानिकोटमा साउनयता प्रसूति सेवा लिएका ४६ जना महिलाले प्रोत्साहन भत्ता पाएका छैनन् । गाउँपालिकाको कार्यालयमा पटक–पटक आमा सुरक्षा कार्यक्रमको बजेट माग गर्दा पनि भुक्तानी नपाएकाले स्वास्थ्य संस्थामा प्रसूति सेवा लिन आउने महिलालाई रित्तो हात फर्काउनुपरेको स्वास्थ्यचौकीका इन्चार्ज जन्मऋषि न्यौपानेले बताए ।
जिल्ला स्वास्थ्य कार्यालय हुँदा स्वास्थ्य संस्थाको नाममा पहिल्यै पेस्की ल्याएर हरेक सुत्केरीको हातमा प्रोत्साहन भत्ता बाँड्ने गरिएको थियो । ‘गाउँपालिकामा माग गर्दा लेखापालले पेस्की दिएनन्, हामीले कसरी दिनु ? ’ उनले भने ।
यस्तै पचालझरना गाउँपालिकाको बदालकोट स्वास्थ्यचौकीमा प्रसूति सेवा लिन आउने महिलाले पनि प्रोत्साहन भत्ता पाउन सकेका छैनन् । जिल्लाको तिलागुफा नगरपालिका, शुभकालिका गाउँपालिका, शान्नित्रिवेणी गाउँपालिकामा पनि स्वास्थ्य संस्थामा प्रसूति सेवा लिन आउने महिला खाली हात घर फर्किने गरेका छन् ।
जिल्ला स्वास्थ्य कार्यालयका पोषण कार्यक्रमका फोकल पर्सन कटकबहादुर महतले स्थानीय तहमा कार्यरत लेखापालको लापरबाहीका कारण आमा सुरक्षा कार्यक्रमअन्तर्गत स्वास्थ्य संस्थामा सुत्केरी हुन आउने महिलाले पाउने प्रसूति भत्ता नपाउने गरेको बताए । उनले जिल्लाभरिका स्वास्थ्यकर्मीले सुत्केरी भत्तालगायत सेवा नपाएको गुनासो आइरहेको बताए । उनले भने, ‘तहविरुद्ध प्रशासनमा जानुपर्ने अवस्था आएको छ ।’
यता पचालझरना गाउँपालिकाका लेखापाल नरदल बुढाले आमा सुरक्षा कार्यक्रममा बजेट अभाव भएकाले सबै स्वास्थ्य संस्थामा रकम दिन नसकिएको बताए । स्वास्थ्य चौकी नानिकोटमा एक लाख ६० हजार, स्वास्थ्य चौकी बदालकोटमा एक लाख र स्वास्थ्य चौकी राम्नाकोटमा दुई लाख तत्काल भुक्तानी दिएको र दुई लाख बढीको न्यानो झोला खरिद गरिएकाले बजेट सकिएको बताए ।
अन्य कर्मचारीले समेत स्थानीय भत्ता नपाएकाले थप बजेट माग गरिएको उनले बताए । गाउँपालिकामा बजेट अभावकै कारण स्वास्थ्य संस्थालाई रकम निकासा गर्न नसकिएको उनको भनाइ छ ।
प्रतिक्रिया दिनुहोस !
