बार्सिलोना : स्पेनिस ‘पावर हाउस’ रियल म्याड्रिडका कप्तान सर्जियो रामोसमाथि एक खेलका क्रममा जानिजानि फल खेलेको आरोप लागेको छ । च्याम्पियन्स लिगअन्तर्गत आयाक्सविरुद्धको प्रिक्वार्टरफाइनलको पहिलो लेग खेलमा जानाजान फल खेलेर पहेँलो कार्ड पाएको खाएको आरोपमा उनीमाथि छानबिन पनि हुने भएको छ ।
उक्त खेल फेब्रुअरी १४ तारिखमा आयाक्सको मैदानमा खेलिएको थियो । उक्त खेलमा रियल म्याड्रिड २-१ गोलले विजयी भएको थियो । खेलको ८९ औं मिनेटमा रामोसले आयाक्सका कास्पर डोलबर्गलाई खतरनाक ट्याकल गरेपछि रेफ्रीबाट पहेँलो कार्ड पाएका थिए ।
रामोसले उक्त पहेँलो कार्ड जानाजान फल खेलेर पाएको आरोपमा युरोपेली फुटबल महासंघ (यूईएफए) ले उनीमाथि छानबिन थाल्ने भएको छ । सोही कार्डका कारण अब कप्तान रामोसले प्रिक्वार्टरफाइनलको दोस्रो लेग खेल खेल्न नपाउने भएका छन् ।
आयाक्सविरुद्घको खेल सकिएपछि सञ्चारकर्मीद्वारा सोधिएको एक प्रश्नको जवाफमा रामोसले भनेका थिए, ‘त्यो कार्ड पाउनमा मेरो पनि हात छ भनेर नस्विकार्नु झुट हुनेछ ।’ त्यसपछि उनले आफ्नो उक्त भनाइ सच्याएका थिए । ‘त्यो फल खेल्नु मेरो बाध्यता थियो । मैले कार्ड पाउनका लागि जानेर फल खेलेको थिइन’, केही समयपछि उनले आफ्नो भनाइ सच्याएका थिए ।
‘८८औं मिनेटमा निकै खतरनाक काउन्टर अट्याक भएको थियो । त्यसमा आयाक्सले गोल गरेको भए खेल बराबरीमा सकिने अवस्था थियो’, उनले भनेका छन् । उक्त प्रतिस्पर्धात्मक खेलको ५३ औं मिनेटमा रियलका लागि करिम बेन्जेमाले पहिलो गोल गरेका थिए ।
खेलको ७५ औं मिनेटमा आयाक्सका हकिम जियचले जवाफी गोल गरेका थिए । ८७ औं मिनेटमा मार्को एसेन्सियोले अर्को गोल थप्दै रियललाई जित दिलाएका थिए । गल्ति गरेको प्रमाणीत भएमा रामोसले क्वार्टरफाइनल खेल पनि खेल्न नपाउने सम्भावना छ । जानेर फल खेली कार्ड पाउने खेलाडीलाई दुई खेलको प्रतिबन्ध लगाउन सक्ने प्रावधान छ ।
प्रतिक्रिया दिनुहोस !
