रुकुम पश्चिम : सामान्यतः विवाह भन्ने वित्तिकै एउटा दृश्य अगाडी आउँछ। सजिएको मण्डप, रमाएका जन्ती र निम्तालुको चहलपहल अनि भोज-भतेरको चटारो। तर, आइतबार रुकुम पश्चिममा एउटा यस्तो विवाह समारोहको आयोजना गरियो, जहाँ यी कुनै कुराको छनकसम्म थिएन। भित्तामा टागिएको 'प्रगतिशील विवाह' लेखिएको एउटा सानो व्यानर र कापी-किताबले मञ्च सजियो।आफूलाई पढाएका गुरुलाई साक्षी राखेर विद्यालयमै सम्पन्न भयो विवाह।
साइत हेर्ने, चिना जुराउने र भोज-भतेर गरेर नेपाली संस्कारको विवाहभन्दा नितान्त फरक ढंगले आइतबार रुकुम पश्चिमको मुसीकोट नगरपालिका-१ सल्लेको सरस्वती माध्यामिक विद्यालय प्राङगणमा आयोजना गरिएको एक औपचारिक समारोहमा नरेन्द्र विक र रिना राईको जोडी वैवाहिक बन्धनमा बाँधियो।
मुसीकोट-१ सल्लेका नरेन्द्रले खोटाङ जिल्ला दिक्तेल नगरपालिका- ७ की रिनासँग विवाह गरेपछि आफू पढेको विद्यालयलाई १ लाख ५१ हजार नगद तथा ५० हजार बराबरको स्टेशनरी र ५० हजार बराबरको पुस्तक हस्तान्तरण गरेर विवाह सम्पन्न गरेका हुन्।
भड्किलो र चमकधमकसहितको विवाहले खर्च मात्रै बढाउने, फाइदा नहुने भएपछि आफूले यस्तो विवाह गरेको नरेन्द्रले बताए।नेपाली संस्कारअनुसार तामझामका साथ विवाह गर्नुपर्ने पारिवारिक अनुरोधलाई प्रगतिशिल विवाहमा परिणत गर्न चुनौतिपूर्ण भएपनि बाबा-आमा र आफन्तले यो विवाहलाई सहर्ष स्वीकार गरेको नरेन्द्र बताए।
आइतबारको समारोहमा छोरा-बुहारीको इच्छा बमोजिम नै आफूले विवाह गरिदिएको भन्दै नरेन्दका बुबा फत्तेसिंह र आमा देउरुपाले बताए।विद्यालयका शिक्षक, विद्यार्थीलगायत अन्य स्थानीय समाजसेवी तथा आफन्तको उस्थितिमा नरेन्द्र र रिनाले एक-अर्कालाई टिका र माला लगाइ दिएर विवाह सम्पन्न गरे।
सरस्वती माविका साथै रोल्पाको थवाङमा रहेको जलजला मावीलाई पनि नरेन्द्रको परिवारको तर्फबाट नगद १ लाख हस्तान्तरण गरिएको थियो।साथै उनको परिवारले सहिद दीर्घको छोरी सिजमाया घर्ती, बुबाआमा गुमाएकी हेमकुमारी पुन र दलित विपन्न छात्र बालकेश नेपालीलाई उच्च शिक्षाका लागि जनही ५०/५० हजार प्रदान गरेको थियो।
यसरी नरेन्द्रले आफ्नो विवाहमा अनुमान गरिएको खर्च रकम ५ लाख १ हजार विद्यालय र असाह्य विद्यार्थीका लागि समर्पन गरेका हुन्। उनको यो प्रयासलाई उनका गुरु, शुभचिन्तक एवम् अन्यले उदाहरणीय काम भन्दै प्रशंसा समेत गरेका छन्।
प्रतिक्रिया दिनुहोस !
