एजेन्सी : आईसीसीको आयोजनामा थाइल्यान्डमा जारी महिला विश्वकप छनोट प्रतियोगिता अन्तर्गत अन्तिम खेलमा नेपालले कुवेतमाथि ३० रनको जित निकालेको छ । ६ खेलमा ५ जित निकाले पनि नेपाल विश्वकपको अन्तिम चरणको छनोटमा स्थान बनाउन भने असफल भयो।
कुवेतले टस जितेर फिल्डिङ रोजेपछि पहिले ब्याटिङ गरेको नेपाली महिला टोलीले २० ओभरमा ७ विकेट गुमाएर ११६ रनको योगफल खडा गरेको थियो । ११७ रनको विजयी लक्ष्य पछ्याएको कुवेतको महिला टोली २० ओभरमा ९ विकेट गुमाएर ८६ रनमै सीमित भयो।
जित निकाल्ने क्रममा नेपालका लागि करुणा भण्डारी र रुबिना क्षेत्रीले ३–३ विकेट लिए भने नेरी थापा र कविता कुँवरले १–१ विकेट लिए। ब्याटिङतर्फ बिन्दु रावलले सर्वाधिक २८ रन बनाइन् । कप्तान रुबिना क्षेत्रीले २२, नेरी थापाले १९ रन बनाउँदा काजल श्रेष्ठले १८ रनको योगदान गरिन।
२० ओभरको यो प्रतियोगिता सन् २०२० मा अस्ट्रेलियामा आयोजना हुने महिला टीट्वेन्टी विश्वकप र सन् २०२१ मा न्युजिल्यान्डमा आयोजना हुने एक दिवसीय विश्वकप दुवैका लागि एसियाली छनोट प्रतियोगिताका रहेको थियो । यस प्रतियोगिताको शीर्ष स्थानमा रहने टोली मात्रै विश्वकपको अन्तिम चरणको छनोटमा जानेछ ।
नेपाल, थाइल्याण्ड, युएई, हङकङ, कुवेत, मलेसिया र चीन गरी सात राष्ट्रका महिला टोली सहभागी प्रतियोगितामा नेपाल अंक तालिकाको दोस्रो स्थानमा छ । ५ खेलबाट नेपालको १० अंक छ। एक खेल खेल्न बाँकी रहेको आयोजक थाइल्यान्डको पनि १० अंक नै भएपनि रनरेटमा नेपालभन्दा निकै माथि छ।
केहिछिन पछि थाइल्यान्ड र यूएई प्रतिस्पर्धा गर्दैछन् । यस खेलमा थाइल्यान्डले जिते नेपालले दोस्रो स्थान प्राप्त गर्नेछ, यूएईले जिते तेस्रो स्थानमा सीमित हुनेछ। थाइल्यान्ड र यूएईको खेलमा थाइल्यान्डले जितेमा १२ अंक हुनेछ, शीर्ष स्थानमा कायम रहने छ । रनरेटमा पनि निकै अगाडी भएका कारण थाइल्यान्ड हार व्यहोरेमा पनि शीर्ष स्थानमै कायम रहने सम्भावना देखिन्छ ।
यूएईले जितेमा तीनै टोलीको अंक बराबरी त हुन्छ तर रनरेटमा अहिले नै अगाडी भएका कारण नेपाललाई पछि पार्ने पक्का छ।
मलेसिया, यूएई, चीन, हङकङ र कुवेतमाथि जित निकालेको नेपाली महिला टोली आयोजक थाइल्यान्डसँग पराजित हुँदा छनोटको अर्काे चरणमा पुग्न बञ्चित भएको हो।
प्रतिक्रिया दिनुहोस !
