लिभरपुल र आर्सनलको गोल वर्षा, म्यानचेस्टर सिटी र युनाइटेड पनि विजयी

लन्डन :  इङ्लिस प्रिमियर लिग फुटबलको बिहीबार विहान खेलिएको खेलमा अधिकांश बलिया टोलीले स्वभाविक जित हात पारेका छन् । लिभरपुल र आर्सनलले भने विपक्षीको पोष्टमा गोल वर्षा नै गरे ।

लिभरपुलले घरेलु मैदानमा वाट्फोर्डलाई ५-० गोलले हरायो । अर्को खेलमा आर्सनलले पनि घरेलु मैदानमै बर्नमाउथमाथि ५-१ गोलको जित हासिल ग¥यो । म्यानचेस्टर सिटीले घरेलु मैदानमा वेस्टहाम युनाइटेडलाई १-० गोलले हरायो भने म्यानचेस्टर युनाइटेडले क्रिस्टल प्यालेसलाई उसैको मैदानमा ३-१ गोलले पाखा लगायो ।

चेल्सीले भने घरेलु मैदानको फाइदा उठाउँदै बलियो प्रतिद्वन्द्वी टोट्टनहामलाई २-० गोलले हारको स्वाद चखायो । यसैगरी बिहीबार विहान नै खेलिएको अर्को खेलमा साउथह्याम्पटनले पनि आफ्नै मैदानमा फुलहामलाई २-० गोलले पराजित गर्‍याे ।

‘लिग लिडर’ भिलरपुलको जितमा सादियो माने र भिर्जिल भान जिकले दुई/दुई गोलको योगदान गरे । मानेले खेल सुरु भएको नवौं र २०औं तथा भान जिकले ७९औं र ८२औं मिनेटमा गोल गरेका थिए । अर्को एक गोल भने ६६औं मिनेटमा डिभोक ओरिगीले गरेका थिए । मानेले जारी सिजनको प्रिमियर लिगमा क्लबका लागि गरेको गोल सँख्या १४ पुगेको छ ।

लिभरपुलले एनफिल्डमा खेलिएको प्रिमियर लिग खेलमा आफ्नो अपराजित यात्रा ३५ पुर्‍याएकाे छ । वाट्फोर्ड भने प्रिमियर लिगको इतिहासमा विपक्षीको मैदानमा खेलिएको लगातार तीन खेलमा एउटै प्रतिद्वन्द्वीसँग पाँच वा सोभन्दा बढी गोल खाने पहिलो क्लब बनेको छ ।

यसैगरी बर्नमाउथविरुद्घको खेलमा आर्सनलका लागि मेसुट ओजिल, हेनरिक मखतरियन, लाउरेन्ट कोसियल्नी, पियर एमरिक र एलेक्जेन्डर लाकाजेट्टीले एक/एक गोल गरेका थिए । वेस्टहामविरुद्घको खेलमा म्यानचेस्टर सिटीका लागि भने एकमात्र गोल सर्जियो एग्वेरोले गरेका थिए । उनले निर्धारित समयको ५९औं मिनेटमा पेनाल्टीमार्फत टोलीका लागि निर्णायक गोल गरेका हुन् ।

यसैगरी क्रिस्टल प्यालेसविरुद्घको खेलमा म्यानचेस्टर युनाइटेडका लागि रोमेलु लुकाकुले दुई गोलको योगदान गरे । उनले खेल सुरु भएको ३३औं र ५२औं मिनेटमा गोल गरेका थिए । अर्को एक गोल भने ८३औं मिनेटमा आस्ले योङ्ले थपेका थिए ।

बलियो प्रतिद्वन्द्वी टोट्टनहामविरुद्घको खेलमा भने चेल्सीका लागि पेड्रोले ५७औं मिनेटमा पहिलो गोल गरेका थिए । निर्धारित समयको खेल सकिनुभन्दा ६ मिनेटअघि टोट्टनहामका काइरन ट्रिपियरबाट आत्मघाति गोल भएपछि चेल्सीले सजिलो जित हात पारेको थियो । माथिल्ला पाँचवटै टोलीले २८÷२८ खेल खेलिसक्दा लिभरपुल ६९ अंकसहित पहिलो स्थानमा छ ।

म्यानचेस्टर सिटी ६८ अंकसहित दोस्रो र टोट्टनहाम ६० अंकसहित तेस्रो स्थानमा आसिन छन् । ५६ अंकसहित आर्सनल चौथो र ५५ अंकसहित म्यानचेस्टर युनाइटेड पाँचौं स्थानमा रहेका छन् । चेल्सी भने ५३ अंकसहित तालिकाको छैटौं स्थानमा छ ।