बेसीसहर : नेपाल कम्युनिष्ट पार्टीका नेताद्वय स्वर्गीय भरतमोहन अधिकारी र रवीन्द्र अधिकारीले सुरु गरेका राम्रा कामहरुलाई निरन्तरता दिन सके मात्र उनीहरुप्रति सच्चा श्रद्धाञ्जली हुने लमजुङका नेता, कार्यकर्ताहरुले बताएका छन् ।
नेकपा लमजुङले आइतबार बेसीशहरमा आयोजना गरेको श्रद्धाञ्जलीसभामा सहभागी नेता कार्यकर्ताहरुले उनीहरुको असल व्यवहार र क्रियाकलापको अनुसरण गर्नुपर्ने धारणा राखे ।
नेकपा गण्डकी प्रदेश कमिटी इन्चार्ज एवं गण्डकी प्रदेशका मुख्यमन्त्री पृथ्वीसुब्बा गुरुङले स्वर्गीय नेताद्वय अधिकारीबाट नेता कार्यकर्ताहरुले धेरैकुरा सिक्नुपर्ने बताए । निधन भएपछि गुनगान गाउनुभन्दा उनीहरुले गरेका राम्रा कामलाई निरन्तरता दिँदै उचाइमा पु¥याउन सबैमा आग्रह गरे ।
नेपाल कम्युनिस्ट पार्टी (नेकपा) का दिवङ्गत नेता तथा पूर्वउपप्रधानमन्त्री एवं अर्थमन्त्री भरतमोहन अधिकारी उच्च विचार बोक्ने निष्ठावान र जनताको भावना बुझ्ने सच्चा कम्युनिष्ट नेता भएको उनले बताए । नेता गुरुङले उनी पुरानो र नयाँ पुस्ता जोड्ने, बिचारको मामलामा प्रष्ट, जनताको बहुदलीय जनवादका मुल्य मान्यतालाई गहिरो रुपमा आत्मसात गर्ने, प्रजातान्त्रिक उदार बिचारका पक्षपोषक तथा राजकीय जिम्मेवारीलाई योग्यता र कुशलताका साथ सम्हालेका नेता भएको उल्लेख गरे ।
जनतासँग भिज्ने, युवाहरुको ढुकढुकी र सफल मन्त्रीका रवीन्द्रको योगदान रहेको उनले बताए । उनले रवीन्द्रबाट जनतासँग कसरी नजिक रहेर काम गर्नुपर्छ भन्ने कुरा सबै नेताहरुले सिक्नुपर्ने धारणा राखे । उनले केन्द्रमा पार्टी एकतामा ढिलाइ भए पनि जिल्ला तथा स्थानीय तहमा एकीकरण कार्यक्रम अघि बढाउन सुझाव दिए ।
प्रतिक्रिया दिनुहोस !
