प्यारा भाइबहिनीहरू !
म बालबालिकालाई नै ज्ञान सिकाउने शिक्षिका अनि तिमीहरूले पढ्ने कविता, कथा, निबन्धजस्ता साहित्य लेख्ने लेखकसमेत हुँ । त्यसैले यो पत्रिकाका माध्यमबाट मैले सिक्ने र तिमीहरूलाई सिकाउने धेरै कुराहरू छन् । यस लेखमा म बालपत्रिकाले बालबालिकामा पार्ने सकारात्मक परिवर्तनका बारेमा तिमीहरूलाई बताउँछु ।
भाइबहिनीहरू ! हाम्रा बुवाआमाको पुस्ताले बाल्यअवस्थामा पढ्ने कुरामा जे जति दुःखकष्ट गर्नुपर्यो, त्यस्तो हामीले गर्नु परेन । हामीले जे जति दुःखपूर्ण तरिकाले प्रारम्भिक शिक्षा लियौं त्यति दुःख तिमीहरूले गर्नु परेको छैन । हुन त चेतना, भूगोल, आर्थिक अवस्थालगायत धेरै कुराको प्रतिकूलताले आज पनि तिमीहरूको उमेरका धेरै भाइबहिनीले पढ्नै पाएका छैनन् । तर आज पढ्न पाएका तिमीहरू धेरै भाग्यमानी छौ ।
तिमीहरूले अभिभावकबाट घरैमा धेरै कुरा सिक्न पाउँछौ । रेडियो, टीभी, इन्टरनेट आदिबाट प्रसारण हुने बालकेन्द्रित कार्यक्रम हेर्न र सुन्न पाउँछौ । आज बालककै लागि बनाइएका चलचित्र, वृत्तचित्र आदि पनि प्रशस्त छन् । तीबाट पनि धेरै कुरा सिक्न सक्छौ । त्यसैगरी तिमीहरूको ज्ञानसीपको परिधिलाई फराकिलो पार्ने गतिलो माध्यम बाल पत्रिका हो । यस्तो पत्रिकामा तिमीहरूले कविता, कथा, भ्रमणका अनुभव, अरूले रचना गरेका कृतिका प्रतिक्रिया, चित्र, चुट्किला, सामान्य ज्ञान, कोठेपदजस्ता सिर्जनात्मक, बौद्धिक तथा मनोरञ्जनमूलक सामग्रीहरू छपाएर पढ्न र अरू साथीहरू माझ प्रस्तुत गर्न पाउँछौ । मनोविज्ञानबारे अध्ययन गर्नुभएका विद्वानहरूले तिमीहरूको सबै पक्षको भलाइका लागि राम्राराम्रा विचार र सामग्रीहरू पस्किनु हुन्छ । अनि विभिन्न बाल साहित्यकारले मनोरञ्जनात्मक र सन्देशमूलक साहित्य पनि लेख्नुहुन्छ । यस्ता सबै सामग्रीहरू एकै ठाउँ भेट्न पाउँदा कति मजा हुन्छ ? विचार गर त !
अर्को कुरा पनि छ । पत्रिका पढ्दा कोर्सको किताब पढ्दाजस्तो दिक्क लाग्दैन । यसले विस्तारै विस्तारै पढ्ने बानी पो लगाउँछ त । यसले तिमीहरूलाई सिर्जनशील हुन सिकाउँछ । थाहा छ ? टीभी, इन्टरनेट आदिको गलत प्रयोग गर्यौ भने तिमीहरूको पढ्ने, अरू साथी र परिवारसँग रमाउने बानी बिगार्छ । यसले तिमीहरूलाई गलत बाटोमा लाग्न प्रेरित पनि गर्न सक्छ । तर पत्रिकाबाट त्यस्तो हुँदैन नि ! त्यसैले तिमीहरू बाल पत्रपत्रिका पढ्ने गर । यसमा पढेका राम्रा कुराहरू अभिभावक र साथीसँग साटासाट गर्ने गर । त्यसलाई व्यवहारमा उतार्ने गर । आफैं लेख्ने पनि गर । यसो गर्यौं भने तिमीहरूलाई ज्ञानी र विद्वान बन्न झन सहज हुन्छ ।
ल हेर त, मैले लेख्ने अरू पनि कति धेरै कुरा थिए । ती सबै एकै पटक लेख्दा यहाँ अटाउन र तिमीहरूलाई एकै पटक पढ्न पनि त गाह्रो हुन्छ नि ! त्यसैले अर्को अर्को अंकमा भेटौंला ल !
(लेखिका देबु लुइँटेल एसओएस काभ्रेकी नेपाली विषय शिक्षिका हुन् ।)
प्रतिक्रिया दिनुहोस !
