भक्तपुर : भक्तपुरको चाँगुनारायण नगरपालिका ८ सुडालस्थित जय माहेश्वरी इँटाभट्टामा इँटा पार्न बनाइएको पानी पोखरीमा डुबेर सोमबार एक बालकको मृत्यु भएको छ।
महानगरीय प्रहरी परिसर भक्तपुरका अनुसार सोही इँटाभट्टामा काम गर्ने काभ्रेको बेथानचोक गाउँपालिका ३ बस्ने मानसिंह तामाङका साढे २ वर्षीय छोरो अनिश तामाङको मृत्यु भएको हो।
परिसरका निमित्त प्रवक्ता प्रहरी निरीक्षक सुशीलकुमार पाण्डेका अनुसार इँटा बनाउन खनिएको पानी पोखरीमा अचानक डुब्न गइ घाइते भएका अनिशको उपचारको क्रममा मृत्यु भएको हो।
घाइते अनिशलाई उपचारका लागि भक्तपुर नगरपालिका ७ भेलुखेलस्थित सिद्धि स्मृति अस्पताल पुर्याइएको उनले जानकारी दिए।
उपचारकै क्रममा सम्बन्धित चिकित्सकले अनिशको मृत्यु भएको घोषणा गरेको प्रहरी निरीक्षक पाण्डेले बताए।
महानगरीय प्रहरी वृत्त जगाती भक्तपुरबाट प्रहरी टोली गई घटनास्थलमा आवश्यमक अनुसन्धान कार्य गरिएको भक्तपुर प्रहरीले जनाएको छ। घटनाबारे थप अनुसन्धान कार्य भइरहेको बताइएको छ।
प्रतिक्रिया दिनुहोस !
