मन्थलीमा माइक्रोबस दुर्घटना, एकजनाको मृत्यु, एक गम्भीर घाइते
फागुन २०, २०७५ सोमबार २१:१६:०
रामेछाप : रामेछापको सदरमुकाम मन्थली नगरपालिका–२ करमबोटमा सोमबार साँझ माइक्रोबस दुर्घटना हुँदा एकजनाको मृत्यु भएको छ । एकजना गम्भीर घाइते छन् ।
मुस्ताङ जिल्ला थसाङ गाउँपालिका–४ घर भइ हाल झापा बस्दै आएका करिब ४६ बर्षका रामप्रसाद तुलाचनको मृत्यु भएको हो । दुर्घटनामा मन्थली नगरपालिका–२ की अञ्जना खड्का घाइते भएकी हुन् ।
जिल्ला प्रहरी कार्यालय रामेछापका प्रहरी निरीक्षक मोहन थापाका अनुसार मन्थलीबाट मालुखोलातर्फ जाँदैगरेको कुशेश्वर यातायातको बा १ ज ९९०१ नम्बरको माइक्रो बस साँझ ६ः३० बजे दुर्घटनामा परेको हो ।
दुर्घटनामा घाइते भएका तुलाचनलाई स्थानीयहरुले उपचारको लागि मन्थलीस्थित रामेछाप सामुदायीक अस्पताल ल्याउँदै गर्दा बाटैमा ज्यान गएको बताइएको छ ।
अर्का घाइते खड्कालाई भने थप उपचारको लागि काठमाडौँ रिफर गरिएको प्रहरीको भनाइ छ । गाडी सडकबाट करिव एक सय मिटर तल तामाकोसी नदी किनारमा खसेको थियो । गाडीमा चालक सहित तीनजना सवार थिए । दुर्घटनापछि चालक प्रहरीको नियन्त्रणमा छन् ।
प्रतिक्रिया दिनुहोस !
