कमल थापा भन्छन् : सक्ने जतिले देश लुटे, ब्रम्ह्लुट मच्चाए
फागुन २६, २०७५ आइतबार २१:५९:०
गुलरिया :नेपालमा राजाको अभिभावकत्व नभएकाले सक्नेजतिले देशलाई लुटेको राष्ट्रिय प्रजातन्त्र पार्टीका अध्यक्ष कमल थापाले वताएका छन् । मेची–महाकाली राष्ट्रिय स्वाभिमान यात्राका क्रममा बर्दियामा आयोजित आमसभालाई सम्वोधन गर्दै अध्यक्ष थापाले देशमा विदेशी चलखेलसँगै भ्रष्टाचार र ब्रम्ह्लुट ब्यापक भएको आरोप लगाएका हुन् ।
नेपालमा नेताहरुले विदेशीको दवावमा पैसा खाएर हिन्दुराष्ट्रको पहिचान समाप्त पारेको उनको भनाई छ । नेपाली जनतालाई पैसाको लालच, भ्रमपूर्ण झुटा कुरा फैलाएर हिन्दु धर्म परिवर्तन गराई विदेशी धर्म लाद्ने काम भइरहेको उनको गुनासो थियो । ‘विदेशीहरु एकातिर हिन्दु धर्र्म नष्ट पार्ने र अर्कोतिर नेपाली पहिचान ध्वस्त पार्ने षडयन्त्रमा लागेका छन्, यो चलखेललाई मिलेर रोक्नुपर्छ’, उनले भने ।
हिन्दु धर्मले समभावको सम्वन्ध निर्दिष्ट गरेकाले नेपालमा परापूर्वकालदेखि सबै धर्मावलम्वी मिलेर बस्दै आएको थापाले प्रष्ट पारे । गणतन्त्रपछि नेपालमा धार्मिक द्वन्दको खतरा बढेको बताउँदै उनले राजासहितको प्रजातान्त्रिक हिन्दुराष्ट्र फर्काउने अभियानमा राप्रपा लागिरहेको जिकिर गरे ।
गत फागुन १४ गते ताप्लेजुङ्गको पाथीभरा मन्दिरबाट निकालिएको रथ मेची–महाकाली यात्रा गर्दै फागुन ३० गते काठमांडौंमा समापन हुने कार्यक्रम छ ।
प्रतिक्रिया दिनुहोस !
