उपाधिमा ह्याट्रिक गर्ने भलिबल टिमलाई गृहजिल्लामा सम्मान
फागुन २७, २०७५ सोमबार १५:२७:०
रुकुम पश्चिम : आठौं राष्ट्रिय खेलकुद प्रतियोगिताको छनौटका लागि सल्यानमा आयोजित कर्णाली प्रदेश पुरुष भलिबलको उपाधि विजेता रुकुम पश्चिमलाई सम्मान गरिएको छ ।
सोमबार जिल्ला समन्वय समिति, मुसीकोट नगरपालिका, जिल्ला क्रिकेट संघ, जिल्ला ब्याटमिण्डन संघ लगायतले सम्मान गरेका हुन् ।
खेलाडीहरुलाई मुसीकोट नगरपालिकाले नगदसहित सम्मान गरेको छ । १२ जना भलिबल खेलाडीर एकजना उसु खेलाडीलाई नगरपालिकाले जनही २÷२ हजार नगद प्रदान गरेको छ ।
त्यस्तै जिल्ला ब्याटमिण्टन संघका अध्यक्ष अनिल बुढाले भलिबल टीमलाई ५ हजार प्रदान गरे । यसका साथै जिल्ला समन्वय समिति र जिल्ला क्रिकेट संघले दोसल्ला ओढाएर सम्मान गरेका छन् ।
जिल्ला समन्वय समितिमा भएको कार्यक्रममा जिल्ला समन्वय समितिका प्रमुख राजकुमार शर्मा, मुसीकोट नगरपालिकाका प्रमुख देविलाल गौतम र प्रमुख जिल्ला अधिकारी शम्भुप्रसाद रेग्मी लगायतले खेलाडीहरुलाई सम्मान गरेका हुन् ।
त्यस्तै जिल्ला क्रिकेट संघले भने संघको कार्यालयमा बोलाएर खेलाडीहरुलाई सम्मान गरेको हो । संघका अध्यक्ष दीपक बाँठामगर सहित संघका पदाधिकारीहरुले खेलाडीलाई दोसल्ला र अविरले सम्मान गरे । यसका साथै सम्मान स्वरुप खेलाडीहरुलाई खलंगा बजार परिक्रमा गराइएको थियो । जिल्ला खेलकुद विकास समितिले पञ्चेबाजासहित खेलाडीहरुलाई बजार परिक्रमा गराएको हो ।
आइतबार सुर्खेतलाई पराजित गर्दै रुकुम पश्चिम प्रतियोगिताको बिजेता बनेको थियो । योसँगै रुकुम पश्चिमले राष्ट्रिय खेलकुद प्रतियोगिताका लागि आयोजना हुने छनौट प्रतियोगितामा लगातार तेस्रो पटक बिजेता बन्दै ह्याट्रिक गरेको छ ।
यसअघि जिल्लाले छैटौं राष्ट्रिय खेलकुद प्रतियोगिताको छनौटका लागि २०६८ मा कालिकोटमा आयोजना भएको र सातौं राष्ट्रिय खेलकुदको छनौटका लागि रुकुममा २०७० सालमा आयोजना भएको छनौट प्रतियोगिताको उपाधि जितेको थियो ।
प्रतिक्रिया दिनुहोस !
