सरकारलाई थापाको प्रश्न : मधेसको माग जनअभिमतबाट भनेको के हो ?
फागुन २७, २०७५ सोमबार १६:४४:०
नेपालगन्ज : राप्रपाका अध्यक्ष कमल थापाले गृहमन्त्री रामबहादुर थापाको मधेसको माग जनअभिमतबाट पूरा गर्न सकिने अभिव्यक्तिलाई स्पष्ट पार्न सरकारसँग माग गरेका छन् ।
सिके राउत र सरकारबीचको ११ बुँदे सहमतीबारे गृहमन्त्री थापाले आइतबार संघीय संसदलाई जानकारी गराउँदै मधेसी जनताका राजनीतिक, सांस्कृतिक र सामाजिक अधिकारलाई जनअभिमत र लोकतान्त्रिक विधिबाट पूर्णता दिने दिन सकिने बताएका थिए ।
राप्रपा मेची–महाकाली राष्ट्रिय स्वाभिमान यात्राको क्रममा आइतबार दिउसो नेपालगन्जको त्रिभुवन चोकमा आयोजित कोणसभालाई सम्बोधन गर्दै थापाले नेपालको राष्ट्रिय अखण्डता, स्वाधिनता र स्वतन्त्रता चुनावबाट फैसला हुन नसक्ने बताए ।
‘गृहमन्त्रीले जनमत संग्रह हामीलाई स्वीकार छैन । जनअभिमतको कुरा गरेका हौँ भन्नुभयो । जनमत संग्रहबाट हुँदैन भनेको गृहमन्त्रीले भनेर पत्यायौँ तर जनअभिमतबाट भनेको के हो ?’, उनले आक्रोसित हुँदै भने, ‘जनमत संग्रहबाट होइन । पाँच÷पाँच वर्षमा हुने चुनावमा सिके राउतले आफ्नो एजेण्डा लिएर जाने अनि भोटले निर्णय ग¥यो भने पूरा हुने भनिएको हो भने यो भन्दा राष्ट्रघाती कुरा अरु केही हुन सक्दैन ।’
उनले चुनावबाट सबै कुरा फेरिन नसक्ने जिकिर गर्दै भने, ‘चुनावबाट सरकार परिवर्तन हुनसक्छ । व्यवस्था फेरिन सक्छ तर नेपालको राष्ट्रिय अखण्डता, सार्वभौमिकता र स्वतन्त्रता चुनावबाट फैसला हुने विषय होइन । भोट हालेर नेपालको सीमाना घटाउने बढाउने कुरा कदापी स्वीकार्य हुन सकिँदैन ।’
सिके राउत र सरकारबीच भएको सहमतिलाई भने थापाले स्वागत गर्दै भने, ‘सिके राउतले इमान्दारीपूर्वक राष्ट्र विखण्डनको एजेण्डा परित्याग गरेको हो भने हामी त्यसको स्वागत गर्छौँ । यो कुरा सिके राउतले मुख नचपाइकन प्रतिबद्धता व्यक्त गर्नुपर्छ ।’
उनले सहमतिका बुँदामा प्रयोगबारे भाषामा भने आपत्ति जनाए, ‘सम्झौताको भाषा दुई अर्थ लाग्ने खालका छन् । विवादास्पद छन् । अस्पष्ट छन् । राष्ट्रिय अखण्डतासँग सम्बन्धित यस्ता विषयलाई अस्पष्ट र विवादास्पद रुपमा राख्नु हुँदैन ।’
थापाले राष्ट्रिय स्वाभिमान यात्राले धार्मिक स्वतन्त्रतासहितको हिन्दु राज्यका पक्षमा देशैभरी लहर देखिएको दाबी पनि गरे । कार्यक्रममा राप्रपाका बरिष्ठ नेता दीपक बोहोरा, पूर्वगृहमन्त्री बुद्धिमान तामाङ, नेपालगन्ज उपमहानगरपालिका प्रमुख डा. धवल शम्शेर राणाले हिन्दु राष्ट्र र राजसंस्थाबारे धारणा राखेका थिए ।
प्रतिक्रिया दिनुहोस !
