बेसीसहर : हिमपात र पहिरोले करिब एक महिनादेखि अवरुद्ध हिमाली जिल्ला मनाङ जोड्ने बेंसीसहर–चामे सडक सुचारु भएको छ । ६५ किलोमिटरको बेसीसहर-चामे सडकमा हिमपातपछि मनाङको नासों गाउँपालिका–९ दानाक्यूसम्मको करिव ४४ किलोमिटर मात्रै सञ्चालनमा थियो ।
दानाक्यूदेखि चामेसम्मको सडकका हिउँ फाल्नुका साथै हिमपहिरो पन्छाएपछि सदरमुकाम चामेसम्म सडक खुलेको प्रमुख जिल्ला अधिकारी रुद्रनाथ देवकोटाले बताए । सडक खुलेसँगै सवारी आवागमन हुन थालेको छ ।
‘हिमपातले मोटर सडक तथा गोरेटो बाटो पनि अबरुद्ध हुँदा धेरै समस्या भएको थियो । सदरमुकामदेखि गाउँ आउजाउ गर्ने बाटो थिएन । खाद्यान्न ढुवानी ठप्प थियो‘, प्रजिअ देवकोटाले भने, ‘लामो प्रयासपछि सडक खुलेको छ । मानिस आवातजावत हुन थालेका छन् । विदामा गएका कर्मचारी पनि फर्किन थालेका छन् ।’
पुस तेस्रो सातादेखि फागुन तेस्रो सातासम्म मनाङमा हिमपात भएको थियो । पछिल्लो समय फागुन १५ गतदेखि ३ दिन लगातार हिमपात भएको थियो । हिमपातका कारण चामे गाउँपालिका ३ कोतो नजिकैको तिर्चुङाल्डामा खसेको हिमपहिरो हटाएको छ ।
तिमाङ र थान्चोकबीचको स्याक्र्यु खोलामा ढुंगा भासिएको थियो । उक्त ठाउँमा फराकिलो बनाउनुका साथै हिमपातले ढालेका रुख र हिउँ हटाएपछि सवारी साधन आवागमन भएको प्रहरी नायव उपरीक्षक खड्कबहादुर खत्रीले बताए ।
उनका अनुसार स्थानीय प्रशासनको समन्वयमा सडक डिभिजन कार्यालय, स्थानीय तहको सहयोगमा सडक खुलाइएको हो । सडक खुलाइएपछि जनजीवन सामान्य अवस्थामा फर्किन थालेको उनले बताए ।
अन्नपूर्ण संरक्षण क्षेत्र आयोजना (एक्याप), इलाका संरक्षण मनाङका प्रमुख बाबुलाल तिरुवाले सडक खुलेसंगै पर्यटक आगमन शुरु भएको बताए । चामे गाउँपालिका अध्यक्ष लोकेन्द्रबहादुर घलेले सडक खुलेसंगै मानिस आवातजावत र खाद्यान्य सामाग्री ढुवानी हुन थालेको बताए ।
चसो छल्न मङ्सिर–पुसतिर जिल्ला बाहिर गएका स्थानीय विस्तारै फर्किन थालेका छन् । निरन्तरको हिमपातले जनप्रतिनिधि र कर्मचारीहरु पनि जिल्ला छोडेर अन्यन्त्र झरेका थिए । स्थानीय तह र अन्य सरकारी कार्यालयहरुको काम ठप्प भएको थियो ।
मनाङमा यस वर्ष पुस २३ गतेदेखि हिमपात भएको थियो । चार दिन लगातार परेको हिमपात परेपछि माघ ७ गतेसम्म रोकिएको थियो । माघ ८ गतेदेखिको हिमपातले फागुन २ गतेसम्म सडक अवरुद्ध भएको थियो ।
त्यतिबेला अवरुद्ध सडक फागुन ३ गते खुलेको थियो । पुनः फागुन १५ गतेदेखि हिमपात हुँदा सडक पुनः अवरुद्ध भएको थियो । लामो समयसम्म सडक अवरुद्ध हुँदा मनाङमा खाद्यान्य संकट सुरु हुन थालेको थियो ।
प्रतिक्रिया दिनुहोस !
